ناوەندی هەواڵ

 

لە ساڵی ١٩٢٤دا، لە تاران ژنێک چووە سەر تەختی شانۆ، قەمەرولمولک وەزیری بوو کە لە مێژووی هونەری فارسیدا هەنگاوێکی وەک شۆڕشی نا، لە کۆمەڵگەیەکدا کە دەرکەوتنی ژنان لە بەرچاوی ڕای گشتی و گۆرانیوتنیان لە بەردەم پیاواندا ڕووبەڕووی سنووردارکردن دەبووەوە، ئەو بڕیاری دا دەنگی خۆی لەگەڵ ڕای گشتیدا بەش بکات، قەمەرولمولک وەزیری تەنها گۆرانی نەوت، هەروەها دەرگایەکی کردەوە کە دوای ئەو ژنانی تریش بتوانن بچنە سەر تەختی شانۆ.

 

قەمەرولمولک وەزیری، ئەو ژنەی دەنگی خۆی کردە بەرخۆدان لە ساڵی ١٩٠٥دا لە تاران لەدایک بوو، ئەو لە مۆسیقای کلاسیکی ئێراندا بووە یەکێک لە دەنگە هەرە گرنگەکانی سەردەمی خۆی، لە ساڵی ١٩٢٤دا، کاتێک لە بەرامبەر بینەرانی ژن و پیاودا بەبێ سەرپۆش گۆرانی وت، ئەم هەنگاوە لە ژیانی هونەریی ئێراندا بووە ڕووداوێکی گرنگ، لەو سەردەمەدا، ئەو ژنانەی دەیانویست لە بوارە گشتییەکاندا هونەری خۆیان پێشکەش بکەن، ڕووبەڕووی گەلێک ئاستەنگی کۆمەڵایەتی دەبوونەوە،  بەڵام قەمەرولمولک وەزیری بڕوای وابوو کە دەبێت دەنگی ژن لە ناو چاند و ژیانی کۆمەڵگەدا ببیسترێت. بە دەنگە بەهێزەکەی، تەکنیکی گۆرانیوتن و شێوازی تایبەتی خۆی، شوێنی خۆی لە مۆسیقای کلاسیکی ئێراندا گرت، هونەرەکەی تەنها بۆ خۆشی نەبوو، هەروەها لە سەر تەختی شانۆش پەیامێک بوو: ژنان دەتوانن هەڵبژێرن، دەستپێشخەری بکەن و لە بەرامبەر ڕای گشتیدا خۆیان دەرببڕن.

 

هونەرێک کە لەگەڵ مرۆڤایەتیدا بووە یەک قەمەرولمولک وەزیری تەنها بە هونەرەکەی بەناوبانگ نەبوو، دەوترێت کە ئەو لە کۆنسێرتە خێرخوازییەکانیشدا ئامادە دەبوو و یارمەتیی کەسانی هەژاری دەدا، مۆسیقا تەنها بوارێکی هونەری نەبوو، لە هەمان کاتدا ڕێگەیەک بوو بۆ گەیشتن بە مرۆڤەکان و بەشکردنی ئەوەی کە مرۆڤ دەتوانێت بەبخشێتە کەسانی تر.

 

قەمەرولمولک وەزیری، لە ساڵی ١٩٥٩دا لە تاران کۆچی دوایی کرد، بەڵام دەنگی لە مێژووی مۆسیقای ئێراندا مایەوە. چیرۆکەکەشی بووە بەشێک لە مێژووی ئەو ژنانەی ویستیان لەو شوێنانەی پشتیان تێدا تەنگ کرابووەوە، بوونی خۆیان ئاشکرا بکەن.

 

ژیانی قەمەرولمولک وەزیری و چیرۆکەکەی، پرسیاری گرنگیان هێنایە ئاراوە: کێ بڕیار دەدات کە دەنگی کێ ببیسترێت؟ چرای هونەری ژنان لە هەندێک سەردەمدا وەک شتێکی قەدەغەکراو دەبینرێت؟ چۆن هونەر دەتوانێت ببێتە ڕێگەی گۆڕینی تێگەیشتنی کۆمەڵگە؟