ناوەندی هەواڵ

 

دەستەیەک لە هونەرمەندانی هەرێمی کوردستان لە سەکۆی ئازادی لە پارکی ئازادی شاری سلێمانی کۆنگرەیەکی ڕۆژنامەنووسیان ئەنجامدا، تێیدا داواکاری و ناڕەزایەتیەکانی هونەرمەندانیان خستە بەر باس.

لە دەستپێکدا دەرهێنەری فیلم و دراما جەلیل زەنگەنە، نیگەرانی هونەرمەندانی خستەڕوو دەربارەی فەرامۆشكردنی هونەر لە هەرێمی کوردستان و ئاماژەی بەوەدا دەسەڵات هونەرمەندی کوردی بێ بایەخ کردووە و ڕێگە بە دراما و فیلمی بیانی دەدات لە ناو هونەری هەرێمی کوردستاندا جێی ببێتەوە.

 

هەر لە کۆنگرەکەدا ڕاگەیاندنی هونەرمەندان خوێندرایەوە کە ئاڕاستەی وەزارەتی ڕۆشنبیری و لایەنە پەیوەندیدارەکان کراوە، داواکارییەکان بریتی بوون لە:

-دروستکردنی دەستەی باڵای پاراستنی کلتور و هونەر و ڕووناکبیریی لە کوردستان.

-چالاککردنی بڕیار و یاسا و ڕێنماییەکانی وەزارەتی ڕۆشنبیریی لەبارەی وەبەرهێنانی کلتور، نابێ چیدی ئەو وەزارەتە پاشکۆیەکی فەرامۆشکراو بێت.

-تەرخانکردنی بودجەی ساڵانە بۆ وەبەرهێنانی کلتور و هونەر و ڕووناکبیریی، وەبەرهێنانی فیلم و زنجیرەی ناوخۆیی و بۆ دەرەوەش هەناردەی بکات.

 

هەر لە ڕاگەیەندراوەکەدا باس لە کردنەوەی ناوەندێکی هونەری کرا بۆ چاندنی ڕۆحیەتی کوردیی و بایەخدان بە زمان و ئەدەبی کوردیی، بۆ وەرگێڕان و ڕێکخستنەوەی چالاکیی و بۆنە و یاد و فێستیڤاڵەکان، و زیاتر بەرهەمی هونەرمەند، نووسەر و ڕووناکبیران پارێزراو بێت، لەبەرامبەر ماندووبووندا پاداشت بکرێن.

 

ت.پ