Amed – Xizmên Windayan û rêveberên Şaxa Komeleya Mafên Mirovan (ÎHD) a Amedê di hefteya 877'emîn de çalakiya “Bila winda bên dîtin kiryar bên darizandin” li pêşiya Bîrdariya Mafê Jiyanê ya Parka Koşûyolûya Amedê li dar xistin. Di daxuyaniyê de endam û rêveberên ÎHD'ê û Xizmên Windayan û Komeleya Piştgirî û Yekitiyê ya ji bo Kesên Xizm û Nasên xwe li Dergûşa Şaristaniyê Windakirinê re (MEBYA-DER) a Amedê û gelek tevlî daxuyaniyê bûn.

Xizmên Windayan û beşdaran pankarta ku wêneyê windahiyan li ser bûn li erdê raxistin û wêneyên kesên ku hatine windakirin hildan. Vê hefteyê li aqûbeta Ender Togcu ku ji 29'ê Mijdara 1994'an vir vê agahî jê nayê girtin, hat pirsîn.

Çîroka Ender Togcu

Endamê Komîsyona Windayan a ÎHD'a Amedê Firat Akdenîz daxuyaniya hefteyê xwend û diyar kir ku Ender Togcu zewicî bûye û zarokek wî hebûye. Firat Akdenîz anî ziman ku Ender Togcu ji bo biçe nexweşxaneyê ji malê derketiye lê li gorî gotina dayîka wî Ender Togcu qet neçûyê nexweşxaneyê. Firat Akdenîz wiha got: “Heman rojê di seat 22.30'yan de polîs bi ser mala bavê Ender Togcu de digrin û tundiyê li bavê Ender Togcu, Huseyîn Togcu û zarokên wî dikin. Piştre jî bavê Ender Togcu agahî digre ku kurê wî di dest polîsan de ye.”

‘Tevî hemû hewldanan û têkoşîna 31 salan jî hê aqûbeta Ender Togcu nehatiye ronîkirin’

Firat Akdenîz, qala geşedanan kir û got ku tevî 31 sal di ser bûyerê de derbas bûye jî aqûbet nehatiye ronîkirin. Firat Akdenîz diyar kir ku tevî hewldanên malbatê yên hiqûqî jî tu encam nehatiye girtin û axaftina xwe wiha bi dawî kir: “Birayê mezin ê Ender di dema binçavkirina xwe de qêrîn û dengê Ender bihîstiye. Birayê wî yê mezin, Alî Togcu, di roja sêyemîn de li ser riya Erxeniyê hat berdan. Bavê wî Huseyîn Togcu piştî windabûna kurê xwe, her meh serî li Serdozgeriya Dadgeha Ewlehiya Dewletê da lê ji wî re hat gotin ku kurê wî nehatiye binçavkirin û tu qeyda binçavkirina wî tune ye. Birayê wî yê mezin jî bi devkî serî li Qereqola Polîsan a Çarşiyê da. Tevî hemû hewldanan û têkoşîna 31 salan jî hê aqûbeta Ender Togcu nehatiye ronîkirin.”

Çalakî ji bo Ender Togcu û hemû windayan bi deqîeyeke çalakiya rûniştinê bi dawî bû.