Enqere- Pervîn Buldan ku endama şanda Partiya DEM’ê ya ji bo Îmraliyê ye, di konferansa "Jin Li Kêleka Hev Pêşerojê Nîqaş Dikin" de axivî û got ku veguhestina Rêberê Gelê Kurd Abdullah Ocalan bo cihekî nû di nava kompleksa Girtîgeha Îmraliyê de, pirsgirêka statuya wî çareser nake. Pervîn Buldan bal kişand ser wê yekê ku derbarê mijarên wekî "mafê hêviyê" (îhtîmala berdana wî ya di pêşerojê de), derfeta axaftina li Parlamentoyê, an jî şiyana Abdullah Ocalan a hevdîtina bi beşên cuda yên civakê re, hîn ti gav nehatine avêtine. Wê tekez kir ku ji bo pêşveçûna pêvajoyê, pêwîstî bi rêkûpêkkirinên nû heye.

Pervîn Buldan di axaftina xwe de behsa daxuyaniyên Mithat Sancar kir û ev tişt anî ziman: “Hat ragihandin ku Ocalan bo cihekî nû hatiye veguhestin. Di rastiyê de, divê her kes fêm bike ku ev cih hîn jî beşek ji girtîgehê ye, ne li derveyî girtîgehê ye. Mirov ji nava girtîgehê bi xwe dighîje wir. Dibe ku rasttir be mirov tenê wekî cihekî binav bike ku şert û mercên xebatê yên wî hinekî hatine guhertin. Lê belê, divê ez vê yekê tekez bikim: Pirsgirêka statuya wî, tenê bi wê yekê ku Birêz Ocalan çûye wî cihê taybet, nayê pênasekirin.”

‘Guherîna cih, statuyeke nû nade Birêz Ocalan’

Pervîn Buldan, bi bal kişandina ser rola ku ji Abdullah Ocalan tê hêvîkirin û gavên ku hêj nehatine avêtin, axaftina xwe wiha domand: “Îro, ew nîqaşên ku li ser mijarên wekî ‘gelo Birêz Ocalan çûye cihekî nû?’, ‘ew çi cûre cihek e?’ an jî ‘gelo ew vîlla ye?’ tên kirin, tenê dibin sedema tevliheviya di hişê mirovan de, çêbûna têgihîştinên şaş û qelskirina pozîsyon û pêgeha Birêz Ocalan. Em vê yekê qebûl nakin. Birêz Ocalan bi salan e, tevî ku di hucreyeke takekesî de bû jî, her tim ji bo aştiyê têkoşiyaye, xebat kiriye, pêşniyar pêşkêş kirine û tevkariyê kiriye. Lê belê, guherîna cih bi serê xwe statuyeke nû nade wî. Ji ber vê yekê, ji bo zelalkirina pirsên di hişê mirovan de: ev cihê nû, tenê beşek ji kompleksa girtîgehê ye. Dema em serdanê dikin, em hevdîtinên xwe li wir pêk tînin. Bi rastî, demek e ku Birêz Ocalan beriya ku vegere cihê xwe yê berê, ji bo hevdîtina bi me re dihat wî cihî. Wekî ku Mîthat Sancar êvarê ragihand, ev rewş êdî bûye rewşeke mayînde; ew ê li wir bimîne. Lê dîsa jî wekî ku min got, ev nayê wê wateyê ku statuya wî guheriye. Ji bilî vê, pêwîstî bi avêtina gavên berbiçav heye; nemaze ji ber ku Birêz Ocalan daxwaza xwe ya hevdîtina bi hemû beşên civakê re aniye ziman.”

‘Abdullah Ocalan dixwaze bi hemû beşên civakê re hevdîtinê bike’

Pervîn Buldan diyar kir ku daxuyaniyên Serokê MHP’ê Devlet Bahçelî niha ne di rojevê de ne û got: "Wekî ku hûn dizanin, dema ku Birêz Bahçeli ev pêvajo da destpêkirin, behsa 'mafê hêviyê' kiribû. Niha behsa 'mafê hêviyê' nayê kirin. Her wiha di destpêka vê pêvajoyê de, Birêz Bahçelî pêşniyar kiribû ku Ocalan were û li Parlamentoyê bi taybetî jî ji kursiyê Partiya DEM’ê biaxive. Ev mijar jî niha qet nayê nîqaşkirin."

Pervîn Buldan her wiha anî ziman ku Abdullah Ocalan li bendê ye ku wekî koordînatorekî ji bo aştiyê û pêwendiyên siyasî bixebite rolek ku hêj pêk nehatiye û tekez kir ku ew dixwaze bi hemû beşên civakê re têkiliyê deyne.

‘Di pêvajoyê de rewşeke girtî heye’

Pervîn Buldan da zanîn ku hevdîtina wan a dawî bi Abdullah Ocalan re di 13’ê Îlonê de pêk hatiye û got: "Ji wê rojê ve ti têkilî çênebûye. Ji ber vê yekê, rewşeke girtî an jî astengiyek heye. Em ê çawa vê astengiyê derbas bikin? Bêguman, em ê bi hêza jinan vê yekê derbas bikin. Îro, li vê salonê, jin dikarin biryara wê bidin ku 'pêdiviya me bi aştiyê heye'. Jin dikarin bi bangewaziya li desthilatdaran û aktorên sereke yên vê pêvajoyê û her wiha bi zextkirinê xwe di çarçoveya hêzeke kolektîf de birêxistin bikin, da ku berdewamiya pêvajoyê misoger bikin û bighîjin aştiyeke mayînde."

‘Kurd dê bixwazin ku di Destûra Bingehîn de cih bigirin’

Pervîn Buldan axaftina xwe wiha domand: “Bo mînak, got ku dixwaze bi saziyên jinan re hevdîtin pêk bîne. Got ku dixwaze bi rêxistinên jinan, her wiha bi rojnamevan, akademîsyen û beşên din ên civakê re hevdîtin pêk bîne. Lê belê, ev du sal in, yek ji van tiştan jî pêk nehatiye. Tenê heyeteke siyasî diçe, tenê em diçin, ev qas. Helbet, ev yek ji bo pêşveçûna pêvajoyê têrê nake. Dixwazim bînim ziman ku ji bo vê yekê jî, pêwîst e bi lez gav bên avêtin. Ev xala yekem e. Ya duyemîn, derbarê pirsgirêka Kurdan de ji bilî mijara danîna çekan, an jî ka piştî danîna çekan ew ê di Destûra Bingehîn de çawa bên pênasekirin? Ez dikarim vê bersivê bidim: di pêvajoya amadekirina destûreke nû de, Kurd bêguman dê bixwazin ku di wê de cih bigirin. Em dibêjin divê Destûrek Bingehîn a ku bikaribin nasname, çand, maf û statuya xwe ya yasayî tê de bibînin hebe. Em dibêjin ku eger destûreke nû bê nivîsandin, divê ew destûrek be ku her beşeke civakê bikaribe xwe tê de bibîne. Di vê çarçoveyê de, Kurd dê bi awayekî xwezayî bixwazin ku ziman, nasname û çanda xwe ligel aliyên din di destûra nû de bibînin. Dibe ku hîn zû be ku mirov bi hûrgilî li ser vê yekê biaxive, lê her ku pêvajo pêşve diçe, em ê bêguman van nîqaşan bikin. Bi jinan re, bi we re û bi hemû beşên civakê re, ji bo ku diyar bikin ka em ê çawa di destûra nû de cih bigirin. Lê niha, ez pêşniyar dikim ku em vê mijarê bihêlin ji bo dema ku guncaw be.”