Navenda Nûçeyan – Bi biryara Rêveberiya Mala Gel, di sala 2024’an de li bajarê Lozanê yê Îsvîçreyê, navê 3 jinên ku hatine qetilkirin li eywanên konferansê hat kirin.

Navê Jîna Emînî ya ku di sala 2022’yan de ji aliyê hêzên Îranê ve li Tehranê hat qetilkirin, li eywana konferansê ya Mala Gel hat kirin.

Her wiha li her du eywanên din jî navê mafparêz, siyasetmedar û civaknasa Brezîlî Marielle Franco ku di sala 2018’an de hat qetilkirin û navê mafparêz û sendîkavan û endama Greva Jinan a Swîsreyê ya sala 1991’ê Liliane Valceschiniyiyê hat kirin.

Axaftina vekirina eywanê ji aliyê Endama Meclisa Lozanê û Hevseroka Meclisa Partiya Yekitiya Çepgiran Sevgî Koyûncû ve hat kirin. Sevgî Koyûncû ya ku endama Meclisa Jinan a Lajîn a Lozanê ye, di axaftina xwe de bal kişand ser serhildanên ‘Jin Jiyan Azadî’ ku piştî qetilkirina Jîna Emînî dest pê kirin û bandora wan a li Îranê û seranserê cîhanê.

Berxwedana jinan a li Rojava

Sevgî Koyûncû gelek caran anî ziman ku dîroka 40 salan a têkoşîna jinên Kurd bi berxwedana jinan a li Rojava re ruh daye dirûşma ‘’Jin Jiyan Azadî.’’

Sevgî Koyûncû di dawiya axaftina xwe de têkoşîna aktîvîstên Kurd Werîşe Mûradî û Pexşan Ezîzî ku rejîma Îranê cezayê darvekirinê li wan biriye û Soma Pur Muhammedî ya ku ji ber dayîna dersa Kurdî deh sal cezayê girtîgehê lê hatiye birîn, silav kirin û axaftina xwe bi gotina: “Jin Jiyan Azadî” bi dawî kir.