Heleb – Li taxên Şêxmeqsûd û Eşrefiyê bi mebesta rojbûna Rêberê Gelê Kurd Abdullah Ocalan, bi diruşmeya "4'ê Nîsanê vejîna azadiya jin û gelan e"  şahiyek hat lidarxistin. Pîrozbahiya ku li Parka 4`ê Nîsanê ya herêma Şeqif hat lidarxistin, bi deqeyek rêzgirtina ji bo şehîdan destpê kir. Piştre li ser navê Koordînasyona Kongra Star Fehîme Hemo û li ser navê Yekîtiya Jinên Ciwan ên her du taxan Bêrîvan Ebdelo axivîn. Di axaftinan de rojbûna Rêberê Gelê Kurd Abdullah Ocalan li jinan û hemû gelan hat pîrozkirin.

‘Bila sala 2026’an bibe sala azadiya fîzîkî ya Rêber Abdullah Ocalan’

Di axaftinan de hat destnîşankirin ku rojbûna Ocalan roja ji nû ve zayîna azadiyê ya hemû jinên cîhanê û gelên bindest e. Axaftvanan diyar kirin ku heta azadiya fîzîkî ya Rêberê Gelê Kurd Abdullah Ocalan pêk bê, ewê gel têkoşîna xwe bidomîne û wiha gotin: “Fikir û felsefeya Rêber Apo, bi saya projeya wî ya avakirina netewa demokratîk a li ser bingeha azadiya jinê, bingeha rizgariya tevahî mirovahiyê ye. Di heman demê de em hêvî dikin ku sala 2026’an bibe sala azadiya fîzîkî ya Rêber Abdullah Ocalan.”

Di şahiyê de çend şanoyên komên hunerî yên girêdayî Navenda Cemîl Horo ya Çand û Hunerê û Tevgera Heyva Zêrîn li taxên Şêxmeqsûd û Exrefiyê hatin pêşkêşkirin. Şahî bi stran û dîlanan berdewam kir. Pîrozbahî, bi sozdayina girankirina têkoşîn û berxwedanê heta azadiya fîzîkî ya Ocalan bi dawî bû.