Navenda Nûçeyan – Koordînasyona Komalên Jinên Kurdistan (KJK) bi boneya rojbûan 76’an a Rêberê Gelê Kurd Abdullah Ocalan daxuyaniyek nivîskî weşad.

KJK’ê di daxuyaniyê de wiha got: “Em 4'ê Nîsanê rojbûna Rêber Apo pîroz dikin û bi hezkirin û hurmet silav dikin. Li pêşberî bîranîna hevrê Mahsûm Karaoglan û Mûstafa Dag bi rêzdarî bejna xwe ditewînin ku di çalakiyên 4'ê Nîsanê de şehîd bûn û sozê didin ku bîranîna wan bi serketinê bidin jiyîn. Em çalakiya bi wate ya ciwanan silav dikin ku 1'ê Nîsanê ber bi Amarayaê ve dest bi Meşa Azadiyê kirin.”

Di berdewamiya daxuyaniyê de ev tişt hate gotin: “Rêber Apo dema ku 4'ê Nîsanê li gundê Amarayê ji dayik bû, Kurdistan di nava polîtîkayên qirkirinê yên bêrehm ên sedsala 20'emîn de bû, dihate înkarkirin û ketibû rewşeke welê ku nedihate naskirin. Ev nakokî û mezinbûna li ber destê Dayika Uveyş, kir ku Rêber Apo piştre bûyînên duyemîn û sêyemîn jî pêk bîne. Rojbûna destpêkê zayîna fîzîkî û amadekariya ji zayînên din bû. Zayînên duyemîn û sêyemîn jî ew zayîn bû ku bi îradeya xwe pêk anî.”

Zayîna duyemîn, zayîna PKK’ê ye

Zayîna duyemîn, zayîna PKK’ê ye. PKK jinûve afirandina Kurdan bi rengekî azad, wekhev, adîl, hezkirin û hurmetê ye, yekbûna Kurdîtî û sosyalîzmê ye, yekîtiya gelan e, hişyarbûna jinan bi eşqê ye. Gelekî ku gihîştibû wê astê ku xwe înkar bike û ji xwe fedî bike, êdî nasnameya xwe diparast û dest bi vejîn û rabûnê kir. Ya li ber mirinê bû û jê re dihate gotin 'qediya ye' rabû ser xwe û li ber dijmin rabû. Bi vê bûyînê re Kurd û jin hînî rêxistinî û têkoşîna ji bo nasnameya xwe bûn û berê xwe dan azadî û wekheviyê. Li cografya zehmet û pak a çiya, PKK'ê mîna mêşên hingiv û bi nêzîkatiya gerîla dest bi têkoşîna mezin a afirandina heqîqeta civak û mirovên pak kir. Bi hişmendiya hevrêtî, dostanî û hevaltiyê ji nû ve û bi rengekî xurt reh berda. Keda bîst salan a Rêber Apo ya li Rojhilata Navîn, bi deh hezaran şehîd, rabûna bi sed hezaran mirovî li serhildanê, tevlîbûna jinan a pêl bi pêl, keda mezin a bi hezaran gerîla ya li her bihosta çiya rêya ber bi zayîna sêyemîn diyar kir.

Piştî komploya 15'ê Sibata 1999'an guhertina paradîgmayê jî bû zayîna sêyemîn. Pirsa, 'Hişmendî, îrade û nasnameya Kurd a ku ronî bû wê bi sîstemeke çawa ya jiyanê bê pênasekirin?' weke heqîqeta civakê, heqîqeta jinê bersiv jê re hate dayin. Ev yek ji bo gelan, ji bo jinan pêşketineke şoreşgerî ya gelekî mezin e. Ji bo mirovahiyê, Rojhilata Navîn, Kurdistanê û ji asta xwecihî ber bi gerdûnî ve ji bo jinan bû wêrekî, gav û hêviyeke mezin. Dilopa zayîna yekemîn bi avabûna PKK'ê re veguherî deryayê, bi zayîna sêyemîn a li Îmraliyê re jî ber bi okyanûsbûnê ve çû. Zayîna cara sêyemîn hîn bêhtir nêzî gerdûnîbûnê û heqîqetê kir. Weke dewama vê pêvajoyê banga 27'ê Sibatê ya Rêber Apo bû tacîdarkirin û manîfestokirina zayîna sêyemîn.

4'ê Nîsana îsal, rojbûna 76'an a Rêber Apo ji aliyê Kurdistan, Tirkiye û Rojhilata Navîn ve, ji aliyê jinan ve ji bo rêvekirina li civaka demokratîk û aştiyê xwedî qîmeteke gelekî mezin e. Pîvana esasî ya bicihanîna vê manîfestoyê jî pêkhatina azadiya fîzîkî ya Rêber Apo, demokratîkbûna siyasetê û afirandina bingeha hiqûqî-qanûnî ye. Lewma 4'ê Nîsana 2025'an tê wateya bilindkirina têkoşîna ji bo azadiya mutleq a Rêber Apo ku dikeve sala 76'an. Ev yek berpirsyarî û wezîfeya me ya li pêşberî Rêber Apo ye ku rojbûna xwe kir rojbûna me.

‘Em bang li hemû ciwanan dikin berê xwe bidin Amara’

Li ser vê bingehê em bang li jinan, ciwanan, gelê xwe yê welatparêz, dostên xwe, zarokan hemûyan dikin ku berê xwe bidin warê vejîna destpêkê Amarayê. Em îsal di 4'ê Nîsanê de rojbûna destpêkê û ya sêyemîn bikin yek, hêza Rêber Apo û ya gelan, jinan, ciwanan û zarokan bikin yek. Em xaka qedîm a Amarayê bikin sembola aştî, berhemdarî û rojbûna azadiyê. Jin, ciwan, zarok divê bi Rêber Apo re ber bi azadiyê ve li warê jidayikbûna Rêber Apo bimeşin û vejînê bi rizgariyê re bikin yek.

‘Dem hatiye ku ji aliyê fîzîkî ve jî ji Îmraliyê derbas bike’

Em bang li gelê xwe yê li hemû parçeyên Kurdistanê û derveyî welat dikin, bi taybetî bang li jinan, ciwanan, zarokan û dostan dikin ku li her deverê li ser bingeha azadiya fîzîkî ya Rêber Apo 4'ê Nîsanê pîroz bikin û li her derê kulîlk û şitlê daran biçînin. Her dareke ku îsal bê çandin divê bi daxwaza dara jiyanê ya Aştî û Civaka Demokratîk ji bo azadiya fîzîkî ya Rêber Apo bê çandin û Kurdistan û xweza bi vê yekê re bê şînkirin. Zayîna sêyemîn li Îmraliyê pêk hat, ji aliyê fikrî ve Îmrali derbas kir. Niha dem hatiye ku ji aliyê fîzîkî ve jî ji Îmraliyê derbas bike. Dem dema bûyînên nû ye. Dem dema bûyînên azadiyê ye. Dem ew dem e ku bi zayîna sêyemîn a Rêber Apo re aştî û civaka demokratîk bê afirandin. Li ser vê bingehê em rojbûna Rêber Apo careke din pîroz dikin.”