Navenda Nûçeyan – Îro bi dehan sazî û rêxistinan daxuyaniyek hevbeş weşandin û tê de piştgiriya xwe bi girtiyên girtîgeha Qizil Hesarê yên ku di greva birçîbûnê de ne nîşan dan. Saziyan daxwaz kirin ku bila yekser darvekirin bên rawestandin û tevahî cezayên darvekirinê yên li Îranê bên rakirin.

Sazî û rêxistinên ku daxuyanî dane ragihandin ku girtiyên Qizil Hesarê ji 13’ê Tîrmeha 2026’an û vir ve bi armanca nerazîbûna li dijî darvekirinan dest bi greva birçîbûnê kirine. Di daxuyaniyê de hat tekez kirin  ku ji bo çareserkirina pirsgirêkên tenduristî û mafên mirovan ên girtiyan pêdiviyeke lezgîn heye.

Zêdetirî 50’î girtiyên siyasî hatine darvekirin

Di daxuyaniyê de hate destnîşankirin ku Komara Îslamî bi dehan sal e cezayê darvekirinê ji bo tepeserkirina nerazîbûnan, belavkirina tirsê û parastina desthilatdariya xwe bikar tîne. Îmzekaran ragihand ku ji dawiya Adara 2025’an û vir ve, herî kêm 50’î girtiyên siyasî û kesên ku di salên dawî de beşdarî xwepêşandanan bûne hatine darvekirin û gelekên din jî bi metirsiya darvekirina lezgîn re rûbirû ne.

Daxuyanî her wiha piştgiriyê dide greva birçîbûnê ya girtiyên li girtîgeha Qizil Hesarê û nerazîbûnên girtiyên li girtîgeha Dastjerd a li Îsfahanê, girtîgeha Evîn, girtîgeha Saveh û girtîgeha Lakan a li Reştê.

Îmzekaran bang li civaka navneteweyî, Neteweyên Yekbûyî (NY), Yekîtiya Ewropayê (YE) û saziyên demokratîk kirin ku yekser tedbîrên pêwîst bigirin da ku darvekirinan rawestînin, jiyan û tenduristiya girtiyên di grevê de biparêzin û siyaseta darvekirin û tepeserkirinê li Îranê bi dawî bînin.

43 sazî û zêdetirî 300 çalakvanan daxuyanî îmze kirin

Daxuyanî ji aliyê 43 sazî, rêxistin û koman ve hat îmzekirin. Di nav îmzekaran de ev sazî hene: “Hevpeymaniya Jinên Çepgir, Hevpeymaniya Jinên Kurdistanê, Yekîtiya Sosyal Demokratên Îranê, Komeleya Îranî ya li dijî Darvekirinan, Komeleya Mafên Jinan a Swêdê, Parêzvanên Mafên Kurdistanê, Eniya Neteweyî ya Îranî ya Ewropî, Partiya Karkerên Komunîst a Îranê, Rêxistina Mafên Jinan a Swêdê, Tora Cîhanî ji bo Azadkirina Girtiyên Siyasî û Girtiyên Wijdanî li Îranê, Tora Jinan a Belcîkî, ​​Rêxistina Jiyan û Azadî, Kampanyaya Cîhanî ya Na ji Darvekirinan re li Îranê, Navenda Khavaran, Komîteya Navneteweyî ya li dijî Cezayê Mirinê, Kampanyaya Azadkirina Karkerên Girtî, Kampanyaya Azadiya Warîşeh Mûradî û zêdetirî 300 çalakvan hene.”

Îmzekaran tekez kirin ku mafê jiyanê mafekî bingehîn ê mirovan e, cezayê darvekirinê wekî "cezayek hovane, nemirovane û bêveger" pênase kirin û daxwaz kirin ku li Îranê hemû cezayên darvekirinê bi tevahî bên rakirin.