MEDÎNE MAMADOGLU

Amed- Piştî hilbijartinên herêmî yên ku di 31’ê Adarê de li bajarên Tirkiye û Kurdistanê hatin kirin, hevşaredarên Partiya Wekheviya Gelan û Demokrasiyê ku di hilbijartinên Pîranê de bi ferqeke mezin a dengan bi ser ketibû, li navçeyê xebatên xwe didomînin. Yekemîn çalakiya hevserokên navçeyê ku bi guhdarkirina pirsgirêk û daxwazên gel plansaziyên xwe yên xebatê çêkirin, vekirina Navenda Jiyana Jinê ya ku ji aliyê qeyûm ve hatibû girtin. Navenda ku dê xebatên ji bo jinan, perwerdehiya tenduristiyê û civîn lê bên lidarxistin, ji bo jinan jî wek cihê bêhnvedanê ye.

 Em bi Hevşaredara Pîranê ya Partiya DEM’ê Aysel Baran re li ser xebat û projeyên wê axivîn.

'Qeyûm çû û navê jinê hat'

Aysel Baran li ser pêwîstiyên ku li Pîranê Navenda Jinan a ku ji ber qeyûm tayînkirin demek dirêj xizmetê jê re nedihat vekirin de got: “Di ser hilbijartinê re 4 meh derbas bûn. Di serî de tenê mêr dihatin şaredariyê û pirsgirêkên xwe anîn ziman. Her wiha nêrîn û pêşniyarên xwe jî anîn ziman. Dema me dît jin nehatin, me got em herin cem jinan. Li ser vê yekê me civînên jinan pêk anîn. Li gund û navenda navçeyê em bi jinan re hatin cem hev. Di vê civînê de me bi zelalî dît ku bi taybetî pêwîstiya jinan bi mala jinê heye. Ev mal ji bo jinên ku ji gund tên navçeyê jî wek cihê bêhnvedanê ye. Dema jin demeke dirêj li benda wesayitekê dimînin, li vir dimînin, ne li kolanê. Dîsa, di forma xwe ya herî hêsan de, ew dikare hewcedariyek bingehîn an hewcedariya şîrdanê peyda bike." Aysel Baran, anî ziman ku li gorî hemû pêwîstiyan vekirina navendê ji bo wan ji erkekî wêdetir e.

'Em ê komxebat û civînan pêk bînin'

Aysel Baran, diyar kir ku ew ê li navendê ji bo jinan atolyeyan li dar bixin û civînên xwe bidomînin û wiha pê de çû: “Piştî me navend vekir, ji jinên hatin vir re bertekên pir erênî hatin. Jin ji bo ku cîhek ji xwe re hebe û cîhek ku jiyana wan a rojane hêsantir bike pir erênî bûn. Bi taybetî di zivistanê de ev sazî wê zêdetir çareseriyan ji jinan re bike. Ev navend wê weke qadeke ji bo çareserkirina pirsgirêkên jinên navçeyê xizmetê bike. Em hefteyê carekê bi jinan re hevdîtinên xwe didomînin û li daxwaz û gazinên wan guhdarî dikin. Em dixwazin bi mejiyeke hevpar projeyên baş pêk bînin. Em dixwazin li navendê pakêta paqijiyê belav bikin û li ser tenduristiya jinan û tundiya li ser jinê perwerde û atolyeyan li dar bixin. Li vê navendê em ê hemû xebatên xwe bi jinan re pêk bînin."

'Em ê qadên kar ava bikin'

Aysel Baran, diyar kir ku projeyên wan dê di her qadê de bidomin û got ku ew ê xebatên ku hem ji bo jinan hem jî ji bo çandê dane meşandin yek bi yek pêk bînin. Aysel Baran bi van gotinan dawî li axaftina xwe anî: “Em dizanin ku di sala 2016’an de bi tayînkirina qeyûman re hedefa yekemîn saziyên jinan bûn. Di vê mijarê de wêraniya ku di nava 8 salan de li navçeyê pêk hatiye bi awayekî zelal nîşan dide. Jin dixwazin li vir xwedî kar bin. Ya ku herî zêde daxwaz dikin kar e. Ji bo bicihanîna vê daxwazê ​​gava yekemîn em li ser vekirina qada bazarê ji bo jinan difikirin. Krîza aborî herî zêde bandorê li jinan dike. Em dixwazin qadek ku tenê jin lê biçe ava bikin da ku vê bandorê kêm bikin. Em ê hem van daxwazan hem jî van qadan biparêzin. Armanca me ya herî mezin guhdarîkirina jinan û hilberandina çareseriyên hevpar e. Her wiha em ê li navçeyê xebatên çand, huner û ziman jî bikin. Em plan dikin ku di nava şaredariyê de qursa ziman bi zaravayên Kurmancî û Kurmanckî yên Kurdî vekin."