Navenda Nûçeyan – Wezareta Tenduristiyê ya Lubnanê ragihand ku di encamê êrîşên artêşa Îsraîlê yên li ser başûrê Lubnanê û başûrê paytexta Lubnan Beyrûtê de 6 kes hatin kuştin û 8 kes jî birîndar bûne.

Wezareta Tenduristiyê ya Lubnanê, îro bi daxuyaniyekê diyar kir ku di êrîşa artêşa Îsraîlê ya li ser bajarokê Siksikiye ya li navçeya Seyda a başûrê Lubnanê de, li gorî daneyên destpêkê, 4 kes mirin û 8 kes jî birîndar bûn.

Îro danê sibehê, balefirên şer ên Îsraîlê êrişên hemwext li ser bajarokên Kefar Riman, El-Qelîle û derdorê bajarokê El-Mensurî yên başûrê Lûbnanê de pêkanîn. Êrîşên hewayî  malek li Hanîn, her wiha devereke vekirî li Kefar Riman, avahiyek li devera El-Amra li nêzî bajarokê El-Qelîle li başûr û derûdora Mensûrî kiriye hedef.

Di mehekê de 1142 kuştî û 3315 birîndar

Tevî van hejmarên rojane, hejmara qurbaniyên êrîşên berdewam yên li ser Lubnanê ji destpêka vê mehê ve gihîştiye 1142 kuştî û 3315 birîndaran.

‘Êrîşên Îsraîlê berdewam dikin’

 Ajansa Nûçeyan a Neteweyî ya Lubnanê ragihand ku tankên Îsraîlê îro sibê deriyên bajarokê Beyt Lîf û derdora bajarokên Dibil, El-Quzah, Naqora û herêma Hamol li başûrê Lubnanê topbaran kirin û balafirên bê mirov ên Îsraîlê di serê sibehê de malekê li bajarokê Kefar Riman ê başûr hedef girtiye, di heman demê de hejmarek gundên li sektora rojava jî rastî topbaranek giran tên û êrîşên asmanî di sibehê de herêma Tehwîtêt El-Xedîr yên başûrê Beyrûtê jî hedef girtine.