Navenda Nûçeyan-Li dijî êrîşa polîsên Belçîkayê ya li ser studyoyên Medya Haber TV û Stêrk TV’ê li ber Qada Poel Art a li ber Qesra Edaletê çalakî hate lidarxistin. Çalakî li ser banga kedkarên Çapemeniya Kurd hate lidarxistin. Xebatkarên Medya Haber TV û Stêrk TV, rêxistinên civakî yên sivîl, çapemeniya Belçîka, sendîkayên çapemeniyê, kedkarên çapemeniya azad, Siyasetmedarê Kurd Emîn Pencwînî, hevserokê KCDK-E’yê Engîn Sever, endamên NAV-BEL’ê, endama KNK’ê Nîlufer Koç jî tevlî çalakiyê bûn. Çalakvanan derî û qemereyên ku polîsan li avahiya televîzyonê şikandibûn, anîn cihê çalakiyê. Di çalakiyê de pankartên bi Flamanî, Îngilîzî û Fransî li ser “Ma ji Kurdan re azadiya çapemeniyê nîne?”, “Hûn nikarin Kurdan bêdeng bikin” û “Çapemeniya Azad nikare were bêdengkirin” hatibûn nivîsîn, hatin vekirin.

Piştî deqeyek rêzgirtinê çalakî destpê kir.

'Ez êrîşa li dijî çapemeniya azad şermezar dikim' 

Hevserokatiya NAV-BEL’ê wiha got: “Ev operasyon ji bo krîmînalîzekirina çapemeniya Kurd û qutkirina dengê me, hate kirin. Em vê êrîşê qebûl nakin.”

Li ser navê TJK-E’yê Kezban Dogan jî êrîşa li dijî Çapemeniya Azad şermezar kir û got: “Hûn nikarin me bêdeng bikin. Çapemeniya Azad wê bêdeng nemîne.”

‘Em ê teşhîrkirina sûcên Erdogan, bidomînin’

Ji kedkarên Medya Haber TV’ê Heval Arslan jî ev tişt got: “Tevî ku anaxtar jî hebûn, polîsan 98 dolab û 41 deriyên me şikandin. Çapemeniya Azad ji bo Tirkiyeyê xeteriyeke mezin e! Ev êrîş bi zexta Tirkiyeyê û bi daxwaza Fransayê pêk hat. Em vê êrîşê qebûl nakin. Azadiya çapemeniyê ji bo hemû welatan heye, lê ji bo çapemeniya Kurd nîne. Em ê teşhîrkirina sûcên Erdogan bidomînin.”

Ji Partiya Sosyalîst a Belçîkayê Maxîme Ramîrez jî bi Fransî axivî û êrîş şermezar kirin.

Ji Aktîvîstên Aştiyê ya Belçîkayê Rîshî Sîng jî axaftinek bi Îngilîz hat kirin û nerazîbûn nîşanî êrîşa li dijî televîzyonên Kurd da.

Banga xwedî lê derketinê hat kirin

Ji xebatkarên Stêrk TV Sebahattîn Gultekîn jî zext û komkujiyên berê yên li dijî çapemeniya azad bi bîr xist û got: “Îro Bruksel bûye paytexta êrîşan. Bûye navenda êrîşên korsanwarî. Em êrîşên li dijî çapemeniyê qebûl nakin. Divê her kes xwedî li Çapemeniya Azad û mafê xwe yê nûçewergirtinê, derbikeve.”

Ji Atkvîstên Aştiyê ya Belçîka-Maûrce Kohn jî axaftinek hat kirin û ev peyam hate dayîn: “Azadiya çapemeniyê ji bo her kesê girîng e.”

Ji xebatkarên Stêrk TV Hindirîn Hewramî jî di axaftina xwe de nerazîbûn nîşanî êrîşan da.

Çalakvanan derî û kamerayên ku ji aliyê polîsan ve hatin şikandin, danîn ber Qesra Spî.