BERÇEM CÛDÎ

Kobanê – Rêberê Gelê Kurd Abdullah Ocalan ê ku pêşengiya bîrdoziya Konfederalîzma Demokratîk a ku azadiya jinê, demorasî û civakek ekolojîk digre nav xwe kir, di 4’ê Nîsana 1949’an de li gundê Amara yê girêdayî Rihaya Bakurê Kurdistanê ji dayîk bû. Di 4’ê Nîsana îsal de temenê Rêberê Gelê Kurd Abdullah Ocalan dibe 76 sal. Ocalanê ku jiyana xwe ji bo dozê û gelan fêda kir, ev 26 sal in ku di encama komployeke navdewletî de hatiye girtin û niha li Girava Îmraliyê dimîne. Tevî hemû şert û mercên dijwar ên Abdullah Ocalan dijî, jin û gelê Kurdên ku bîrdoziya wî wek alfebaya jiyana azad dinirxînin, her sal  rojbûna wî pîroz dikin, biryardarî û soza xwe ya misogerkirina azadiya wî ya fîzîkî nû dikin.

Bi taybetî gelê Kobanê ku di 2’yê Tîrmeha 1979’an de Abdullah Ocalan pêşwazî kir, li gundê Elpelûrê yê li Rojavayê Kobanê mala ku Ocalan lê dima, veguherand mûzexaneyê. 

Bi vê mebestê, ajansa me li jinên ku bi bîrdoziya wî bawer in û pêk tînin guhdarî kir, hest, bendewarî û nirxandinên wan tomar kir.

‘Rojbûna Rêber Apo tarîtiya li ser jinan ronî kir’

Hevseroka Tevgera Civaka Demokratîk (TEV-DEM) Hedle Hesen wate û girîngiya 4’ê Nîsanê ya ji bo jinan, wiha nirxand: “Roja 4’ê Nîsanê ne rojbûna kesayeteke normal e, rojbûna felsefe, doz û gelekî ye. Bi taybet jî em jin vê rojê weke zayîna xwe a duyemîn digrin dest û dinirxînin. Bi giştî jin di bin siya hişmendiya mêr-dewlet de ji rastiya xwe hatibûn şûştin, jinên Kurd perçeyek ji vê rastiyê ne. Lewra felsefeya ku Rêber Apo bipêş xist û pêşengiya ku nîşan da, jiyana jinên Kurd ronî kir û ew siya li ser wan, avêt. Bi vê yekê re jiyana me di guherîneke mezin re derbas bû û heta ez dikarim teqez bikim ku em di nava qonaxeke nû a bi têkoşînê re bûye yek de dijîn. Pêşketinên ku jin îro dijîn û destekeftiyên qezenc kirin, di encama keda Rêber Apo de pêk hatin. Dema jinan heqîqeta xwe ya cudayî rastiya ku li ser hatiye ferzkirin nas kirin, yekser ber bi guhertin û veguhertinê ve çûn ku em îroj berhemên vê yekê dibînin.”

‘Jinên Kobanê gelek bi şans in’

Hedle Hesen da zanîn ku ew bendewariyên azadiya fîzîkî ya Abdullah Ocalan ji mala wî ya li gundê Elpelûrê zindî dihêlin û got: “Em heta dawiyê deyndarên Rêberê xwe ne, ji bo vê jî erk û berpirsyariyên dîrokî li ser milê me hene. Bi roja 4’ê Nîsanê re û destpêka Biharê re jî, soza me ya li hember Rêber Apo nû dibe. Îsal jî bi peyam û banga wî ya dîrokî re, diyar bû ku bi berxwedana Rêber Apo û têkoşîna jinan re mayîndekirina felsefeya jiyana azad pêkan e. Çawa ku me peyama Rêberê xwe bi coş û kêfxweşiyeke mezin hembêz kir, emê jî 4’ê Nîsana Îsal jî bi heman rihî û heta bi biryardariyeke mezintir pêşwazî bikin. Weke jinên Kobanê jî şansê me zêdetir e ku dema em li Mala Rêber Apo ya gundê Elpelûrê vê rojê pîroz dikin, em hîs dikin ku her wekî Serok Apo li gel me ye. Ev mal ji bo me çavkaniya hêz û hêviyê ye ku em salên li pêşiya xwe li gel wî fîzîkî 4’ê Nîsanê pîroz bikin.”

‘Baş e ku em jin in û rêberê me Apo ye’

Rêvebera Tevgera Hîlala Zêrîn Fatma Xelîl hestên xwe yên ji bo rojbûna Abdullah Ocalan wiha bilêv kir: “Meha Adarê ku bi gelek bûyerên xwe yên bi wate û pîroz tê naskirin, bi 4’ê Nîsanê re heybeta xwe dewam dike. Em vê rojê li Rêber Apo pîroz dikin û em dibêjin baş e ku em jin in û baştir e ku tu rêberê me ye. Rêber Apo yê mîmarê felsefeya jiyana azad û demokratîk e, îro hemû mirovahî rojbûna wî pîroz dikin. Ev jî bandora wî ya li ser hizir û fikarên wan dide diyarkirin. Gelek caran ez difikirim, me tenê felsefeya Rêber Apo nas kiriye û em ewqas pê ve hatine girêdan û pê re dilsoz in. Gelo ku di nava me de be û em wî rasterast bibînin û nas bikin, wê rewşa me jinan niha di çi astê de be? Lewra ji bo ev yek jî pêk were, pêwîstiya me bi têkoşîneke mezin heye. Ji hêza netewdewletên komploger zêdetir, pêdiviya me bi berxwedan û têgihîştinê heye.”

‘Emê findên 4’ê Nîsana 2026’an bi hev re vemirînin’

Fatma Xelîl da zanîn ku ewê bi roj û şev bixebitin da ku 4’ê Nîsana 2026’an li gel Abdullah Ocalan pîroz bikin û wiha got: “Ji bo ku ez Rêber Apo zindî bibînim ku ev xeyala me bi deh hezaran jin û gelê Kurd e, emê bixebitin, têbikoşin û rêberê xwe fîzîkî azad bikin. Bi hêviyên ku di 4’ê Nîsana 2026’an de em findên rojbûna wî li Bakûr û Rojhilatê Sûriyê, bi taybet jî li Kobanê ku dilê gelê wî ji dema ku ew li malên xwe pêşwazî kirin lêdide, bi hev re pêxin, em 4’ê Nîsana îsal pîroz dikin. Ev roj gelek nêzik e, ji bo ku em leztir jî bikin emê roj û şevên xwe bikin xizmeta misogerkirina azadiya fîzîkî ya Rêberê xwe. Em ji hêza Rêber Apo bawer in, di vî warî de careke din em dibêjin 4’ê Nîsanê roja vejîn û zayîna mirovahiyê ye.”