Kirmanşah- Mîhrîcana Muzîka Kurdî ku ji aliyê Mala Tembûr a Gundê Banzalan a navçeya Dalaho ya bajarê Kirmaşanê - Rojhilat Kurdistanê ve hat organîzekirin, di navbera 19-20’ê Îlonê de hat lidarxistin. Ji çar aliyên Rojhilatê Kurdistanê bi taybet bajarên Kirmaşan, Sine, Îlam û Hemedanê hunermend, mêvan û hunerhez beşdarî mîhrîcanê bûn. Di mîhrîcanê de îsal jinan bi enstrûmanên xwe stranên xweş gotin.

Di merasîma bidawîkirina mîhrîcanê de ku duh hat lidarxistin, solîstê Koma Mûzîka Nîştîman a bajarê Merîwanê Parand Rehmanî derket ser dikê. Hevdem, Koma Muzîkê ya Şahoşîn a Yarsan, Koma Kia ya Kirmaşanê bi serpereştiya hunermend Danya Şehîdî, hunermendên Bûkanê, Şoreş Mehmûdî ji Mehabadê û helbestvan Seîd Îbadîan duh di merasîma bidawîkirina mîhrîcanê de bi mêvanan re hatin ba hev. 

Hunermendên herêmên Yarsan û ciwanên ji temenên cuda beşdarî beşa pêşbirkê ya mîhrcanê bûn. Di encama pêşbirkê de kesên serketî hatin eşkerekirin.

'Ez bawer dikim ku muzîka Kurdî wê were naskirin'

Yek ji hunermendên ku cara yekem beşdarî mîhrîcanê bûye Dîna Ebdî got: Tembûra Gundê Banzalanê ne tenê cihê defzanan e, belkî cihê hemû Îraniyên ku li enstrumanên kevneşopî lêdixin e. Mala Tembûrê ez kêfxweş kirim, hişt ku ez beşdarî mîhrîcanê bibim, enerjiyê werbigirim û lêxistina tembûrê bidomînim. Ne tenê ez, hemû muzîkjenan jî heyecana ku li vir e, muzîka xwe bidomîne û pêşve biçe, dide. Nêzîkî heşt sal di ser damezrandina Mamoste Alî Ekber Moradî re derbas bûn ku Mala Tembûrê, ku beşdarî pêşkeftina muzîkjenên kevneşopî dike, û her sal mîhrîcanek saz dike. Di beşa pêşbirkê de cihgirtina min cihê rûmetê ye. Ez weke jineke Kurd û tembûrvanek Kurd bawer dikim ku wê muzîka Kurdî di nava civakên cîhanê de were naskirin."

'Banzalan cihê azadiya jinan a stranan e'

Hunermend Kanî Sîmanî yê ji bajarê Qerandê nêrînê xwe anî ser ziman û got: "Mala Tembur bi saya Elî Ekber Moradî hat damezrandin. Mixabin em hemû dizanin ku di warê muzîkê de di civakê de cihêkarî di navbera jin û mêr de heye. Banzalan yekane cihê ku jin lê xwedî derdikeve.  Ji bo pêşketina Mala Tembûrê her kes bi yekîtî dixebite. Ji folklora kurdî jî em dikarin wekheviya kurdan fêm bikin." 

Di pêşbirkê de bû yekemîn

Hunermend Romîna Newrozî ku ev 6 sal in beşdarî mihrîcanê dibe got: "Min ji deh saliya xwe ve dest bi beşdarbûna pêşbirkên muzîk û tembûrê kiriye. Yek ji serpêhatiyên min ên herî baş jî mîhrîcana li gundê Banzalan e. Ji zarokan heta mezinan ji hemû komên temenî re pêşkêşî beşdaran dikin ku nirxê jinan di mîhrîcanê de diparêzin û wekheviyê di navbera hemû beşdaran de misoger dikin. Em îsal jî di kategoriya A Koma Temenê Ciwanan çiqasî bi hêz bin jî, ya girîng hevkarî û hevgirtin e, ez spasiya hevrikên xwe yên hêja ku piştgirî dan min dikim.