فادیا جومعە

 

لوبنان-لەگەڵ تەشەنەکردن و بەردەوامی هێرشەکان و زیادبوونی شەپۆلەکانی ئاوارەبوون، چەندین چیرۆکی ئاوارەیی و دڵەڕاوکێ لە پەناگە ئاوارەییەکان لە لوبنان کۆدەبنەوە. بەڵام چیرۆکەکانی ئازارەکانی ژنانی دووگیان بە مەترسیدارترین شێوە لەگەڵ قووڵبوونەوەی قەیرانەکان دەمێننەوە، لە نێوان ترسی منداڵ و سەرچاوە سنووردارەکان، دووگیانی دەگۆڕێت بۆ تاقیکردنەوە و ئەزموونێکی ڕۆژانەی ژیان.

 

لەناو ئەو هێرش و ئاوارەبوونەدا، هەزاران ژنی دووگیان خۆیان لەبەردەم دوو هەڕەشەدا دەبیننەوە: لەلایەک مەترسی بۆردومانکردن و لەلایەکی دیکەوە نەبوونی چاودێری تەندروستی گونجاو. لە ئێستادا نزیکەی ١٤ هەزار ژنی دووگیان و ئاوارە لە ژێر فشاری مرۆیی تونددا دەژین کە مەترسی لەسەر ژیانیان و ژیانی منداڵە تازە لەدایکبووەکانیان دروست دەکات.

 

هەزار و ٣٠٠ کۆچبەر لە پەناگەیەکی ئاوارەیی دەمێننەوە

مەلیکە حەلەبی، ئەندامی هەماهەنگی پاراستنی یاسایی لە یەکێتی کۆمەڵەکانی گەشەپێدان و فریاگوزاری لە ناو یەکێک لە پەناگە ئاوارەییەکان لە سیدۆن، کە تیمەکانی فریاگوزاری لە یەکەم ڕۆژی هێرشەکانەوە لەوێ کاریان کردووە ئاشکرای کرد، سەنتەرەکە نزیکەی هەزار و ٣٠٠ ئاوارەی باشووری لوبنانی وەرگرتووە لەناویاندا ژمارەیەکی زۆر منداڵ و ژنان و کەسانی بەتەمەن هەن، هەروەها ژنانی دووگیان هەن کە پێویستیان بە چاودێری تایبەت هەیە، هەماهەنگی لەگەڵ ڕێکخراوە تەندروستی و مرۆییەکان ئەنجام دەدرێت بۆ دابینکردنی چاودێری پێویست بۆ ژنانی دووگیان لەم بارودۆخە سەختانەدا.

 

"سەرنجم زیاتر لەسەر ژنانی دووگیانە"

مەلیکە حەلەبی ڕایگەیاند کە ئەزموونی کاری خۆبەخشی لە ململانێکانی ڕابردوو و ئێستا وایکردووە زیاتر ئاگاداری ئازارەکانی ژنانی دووگیان بێت وتی: ڕۆڵی من تەنها لە دابینکردنی هاوکارییە سەرەتاییەکانی وەک خۆراک و دەرماندا سنووردار نییە، هەروەها هۆشیاری یاسایی لەخۆدەگرێت، بەتایبەتی کە یاسای نێودەوڵەتی و مرۆیی، لەوانەش ڕێککەوتننامەکانی جنێڤ، پارێزگارییەکی تایبەت بۆ ژنانی دووگیان لە کاتی شەڕی چەکداریدا دابین دەکات.

 

"ئێمە لە کاتی شەڕدا نیگەرانین لە ژیانی ژنان"

مەلیکە حەلەبی هۆشداریدا لە بەردەوامی بەئامانجکردنی خەڵکی مەدەنی لە کاتی شەڕدا و وتی: ئەگەر ئەوانیش ئامانجی سەربازیش نەبن، خەڵکی مەدەنی دەکرێنە ئامانج، ڕووداوەکانی ئەم دواییە ژنانی دووگیانیشیان گرتەوە، ئێمە زۆر نیگەرانین لە تێکچوونی دۆخی مرۆیی بەهۆی درێژبوونەوەی شەڕەکە یان وەستانی هاوکارییەکان. بەو پێیەی ئەمە دەتوانێت ببێتە هۆی دروستبوونی سیناریۆی مەترسیدار کە کاریگەری لەسەر ژیانی ژنان هەبێت، بەتایبەتی بەهۆی نەبوونی چاودێری تەندروستی.

 

مەلیکە حەلەبی جەختی لە ڕۆڵی کۆمەڵەکان کردەوە لە دەستەبەرکردنی کەمترین ئاستی پاراستن و پاڵپشتی لە پەناگە و لە کارکردن بە گوێرەی بڕیارەکانی نەتەوە یەکگرتووەکان سەبارەت بە ژنان و ئاشتی و ئاسایش و لە کۆتاییدا وتی کە پێویستی بە بەهێزکردنی پاراستنی ژنان هەیە لە کاتی ململانێکاندا.

 

ئەزموونێکی سەخت و ئاڵۆز

ئەمیرە بەشیر، ژنێکی ئاوارە و دووگیانی حەوت مانگە. ئەمیرە ئازارەکانی ڕۆژانەی خۆی لە ناو داڵدەگاکەدا دەگێڕێتەوە. ئەمیرە ئاماژەی بەوەشکرد، هەرچەندە هەندێک هاوکاری وەردەگرێت، بەڵام بە سنووردار و بەس نییە بۆ دابینکردنی پێداویستییەکانی وەک ژنێکی دووگیان یان پێداویستییەکانی خێزانەکەی.

 

ڕوونیشیکردەوە، بەهۆی سەختی بارودۆخی ژیان، ناچارە لەسەر دوو دۆشەک لە سەنتەرەکە بخەوێت، هاوکات لەڕووی داراییەوە توانای دابینکردنی پشکنینی پزیشکی پێویست نییەو ڕووبەڕووی فشاری دەروونی سەخت دەبێتەوە، هەروەها ئەو ئازارە جەستەییە بەردەوامەی کە ئەزموونی دووگیانی لە ئاوارەبووندا قورستر و ئاڵۆزتر دەکات.