ناوەندی هەواڵ

 

 لێکۆڵینەوەیەک لەلایەن ئێران وایەرەوە، کە وەک پلاتفۆرمێکی هەواڵی سەربەخۆ و ئۆپۆزسیۆن ناسراوە، بڵاوکراوەتەوە و ئاشکرای کردووە کە زیندانییەکانی زیندانی ژنانی دەوڵەتئابادی لە شاری ئەسفەهانی ئێران، ڕووبەڕووی ئەشکەنجەی جەستەیی و دەروونی دەبنەوە و لە ژینگەیەکی نامرۆڤانەدا ڕاگیراون.

 

بەپێی ئەو چاوپێکەوتنانەی لەگەڵ کەسوکاری زیندانییە سیاسییەکان و سەرچاوەکانی دیکە ئەنجام دراون، ڕاپۆرتەکە ئاماژە بەوە دەکات کە لە بەشێکی زیندانەکەدا کە بە ژووری تاریک ناسراوە، زیندانییەکان بۆ چەندین ڕۆژ بە دەستی بەستراو، لە تاریکیدا و بێبەش لە خواردن و ئاو و بەکارهێنانی ئاودەست ڕادەگیرێن.

 

ئێسکەکانی زیندانییەکان شکاون.

لە ڕاپۆرتەکەدا ئاماژە بەوە کراوە کە زیندانییەکان لە کاتی لێپرسینەوەدا ڕووبەڕووی ئەشکەنجە بوونەتەوە و ئێسکی هەندێکیان شکاوە. هەروەها ڕاپۆرتەکە دەڵێت دەنگی ئەشکەنجەدان لە ڕێگەی کەناڵەکانی هەواکێشانەوە گەیشتووەتە زیندانەکانی دیکە و فشاری دەروونی لەسەر زیندانییەکانی دیکە دروست کردووە. هەندێک زیندانییش ناچار کراون بەڵگەنامە واژۆ بکەن کە تێیدا هاتووە دوای لێپرسینەوە ئەشکەنجە نەدراون.

 

دایکیان نەیتوانیوە کچەکانی بناسێتەوە.

لە ڕاپۆرتەکەدا هاتووە کە دوو خوشک بە ناوی تارانە و ڕۆمینا ڕەحیمی، کە لە خۆپیشاندانەکانی مانگی یەکەمدا دەستگیر کرابوون، ڕووبەڕووی ئەشکەنجەی توند بوونەتەوە. بەپێی سەرچاوەکان، بەهۆی ئەو توندوتیژییەی بەرامبەریان کراوە، دایکیان لە یەکەم بینینیاندا نەیتوانیوە بیانناسێتەوە.

 

هەروەها لە ڕاپۆرتەکەدا ئاماژە بەوە کراوە کە کوڕی سۆمایە ئەفشار، عەلیرەزا سەپاهی، لەبەردەم چاوی دایکیەوە بۆ دانپێدانان بە تاوانێک ئەشکەنجە دراوە. عەلیرەزا سەپاهی لە ٥ی تشرینی یەکەمی ٢٠٢٦دا لەسێدارە دراوە، بەڵام دایکی هێشتا لە زینداندا ماوەتەوە.

 

نەخۆشەکان بۆ نەخۆشخانە نەگوازراونەتەوە.

هەروەها ئاماژە بەوە کراوە کە زیندانەکە تووشی قەرەباڵغییەکی زۆر، کەمیی خۆراک و کێشەی پاکوخاوێنی بووە. ڕاپۆرتەکە دەڵێت لە بەشەکانی زینداندا کە توانای وەرگرتنی ٢٤ کەسیان هەیە، هەندێک جار ٦٧ زیندانی ڕادەگیرێن. هەروەها داواکارییەکانی گواستنەوەی زیندانییە نەخۆشەکان بۆ نەخۆشخانە، بە وەڵامی هەڵبژاردەی گواستنەوەمان نییە ڕەت کراونەتەوە.