ناوەندی هەواڵ

 

ناوەندی ستراتیجی مافی مرۆڤ لە عێراق ڕایگەیاند، سەرەڕای هەوڵەکانی حکومەت بۆ ئاوەدانکردنەوەی ڕێگاوبان و خانووبەرە و سێکتەرەکانی دیکە، پرسی دیکەی گەورە هەن کە کاریگەرییان لەسەر ژیانی ڕۆژانەی هاووڵاتیانی عێراق هەیە لەوانە هەژاری و نەبوونی هەلی کار.

 

ناوەندەکە ئاسکرای کردووە، ئامارەکانی وەزارەتی پلاندانان دەریدەخەن نزیکەی ٢٥%ی دانیشتووانی عێراق لەژێر هێڵی هەژاریدا دەژین، واتە زیاتر لە ١٠ ملیۆن کەس، هەروەها زیاتر لە ملیۆنێک و ٦٥٠ هەزار کەسی بێکار ناویان لە وەزارەتی کار تۆمارکردووە.

 

جەختیشی کردەوە کە حکومەتی عێراق کاربکات بۆ کەمکردنەوەی هەژاری و بێکاری لە وڵاتدا لەڕێگەی داڕشتنی پلانێکی ستراتیژی بۆ پێنج ساڵی داهاتوو، گرنگیدان بە پاڵپشتیکردنی پیشەسازی و کشتوکاڵ، کەمکردنەوەی هاوردەکردنی بەرهەمە کشتوکاڵی و پیشەسازییەکان و چاودێریکردنی کاری بیانی کە بازاڕی عێراقی داگیرکردووە و هەلی کاری کەمکردووەتەوە.