قامیشلۆ

 

ژنانی قامیشلۆ دووپاتیان کردەوە، کە پاراستنی دەستکەوتەکانی ڕۆژئاوای کوردستان بەرپرسیارێتییەکی پێکەوەییە، هەروەها دەنگی ژنان لە هەموو گۆڕەپانەکاندا ئامادەیی دەمێنێتەوە، هەر لە ڕێکخستنی کۆمەڵایەتییەوە تا بوارەکانی خەبات و بەرخۆدان.

 

لە نێوان پەرەسەندنی هێرشە سیاسی و سەربازییەکان کە پڕۆژەی ڕۆژئاوای کوردستان و شۆڕشی ژنانیان کردە ئامانج، ژنانی شاری قامیشلۆ و دەوروبەری ٣١ی کانوونی دووەم خۆپیشاندانێکی هاوپشتییان ئەنجامدا بۆ نوێکردنەوەی بەڵێنیان بۆ پاراستنی دەستکەوتەکانی شۆڕش و جەختکردنەوە لەوەی کە ئیرادەی ژنان وەک بەربەستێک دەمێنێتەوە لە بەرامبەر هەوڵەکانی دوورخستنەوە و شکاندنی ئیرادەی گەل.

 

خۆپیشاندانەکە لە لایەن کۆنگرەی ستارەوە ڕێکخرابوو، کە پەیامێکی ڕوونی بۆ جیهان هەڵگرت، کە تێیدا هاتووە: شۆڕشی ڕۆژئاوای کوردستان پێش ئەوەی شۆڕشێکی جوگرافی بێت، شۆڕشێکی ژنانە و دەنگی ژنانیش لە هەموو گۆڕەپانەکاندا بە ئامادەیی دەمێنێتەوە بۆ بەرگریکردن لە خاک و شکۆمەندی مرۆڤ.

 

ژنان پیشەنگی شۆڕش بوون

ئامادەبووان وتیان: شۆڕشی ڕۆژئاوای کوردستان تەنها گۆڕانکارییەکی سیاسی یان بەڕێوەبەری نەبووە، بەڵکو شۆڕشێکی هزری و کۆمەڵایەتی بوو کە ژنانی خستە پێگەیەکی پێشەنگەوە و ڕۆڵییان وەک هێزێکی بنەڕەتی لە بونیادنانی کۆمەڵگەیەکی ئازاد و دیموکراتیکیدا چەسپاند.

 

جەختیان لەوە کردەوە، کە بەئامانجکردنی سیستماتیکی ناوچەکە لە بنەڕەتدا، هێرشێکی ڕاستەوخۆیە بۆ سەر ئیرادەی ژنان و هەوڵێکە بۆ لەباربردنی ئەو ئەزموونەی کە سەلماندوویەتی ڕزگاری کۆمەڵگە لە ڕزگارکردنی ژنانەوە دەست پێدەکات، لە میانەی وتارەکەیدا، ریحان لوقو، وتەبێژی کۆنگرەی ستار، وتی: ژنان بەردەوام دەبن لە بەرگریکردن لە دەستکەوتەکانی شۆڕش، هەروەها هێرشە بەردەوامەکان ئامانجیان تێکدانی بناغەکانی پڕۆژەی نەتەوەی دیموکراتیک و چاندنی ناتەباییە لەنێو پێکهاتە جیاوازەکانیدایە، بەڵام هۆشیاری و ڕێکخستنی ژنان ڕێگری لەم کارە دەکات.

 

لە میانی خۆپیشاندانەکەدا، دروشمی دووپاتکردنەوەی یەکڕیزی ڕیزەکانی ژنان و پتەوکردنی گیانی هاودەنگی لە نێوان ژنان لە ناوچە جیاجیاکان و پابەندبوون بە بژاردەی بەرخۆدانی ڕەوای دژ بە سیاسەتەکانی وەدەرنانی و هەژموون بەرزکرانەوە.

 

پاراستنی دەستکەوتەکانی ڕۆژئاوا بەرپرسیارێتییە

هەروەها ئامادەبووان جەختیان لەوە کردەوە، کە پاراستنی دەستکەوتەکانی ڕۆژئاوای کوردستان بەرپرسیارێتییەکی پێکەوەییە، دەنگی ژنان لە هەموو گۆڕەپانەکاندا بە ئامادەیی دەمێنێتەوە، هەر لە ڕێکخستنی کۆمەڵایەتییەوە تا بوارەکانی خەبات و بەرخۆدان.

لە کۆتاییدا جەخت لەوە کرایەوە، کە خەباتی ژنان لە ڕۆژئاوای کوردستان سەرەڕای هەموو ئالەنگاریەکان بەردەوام دەبێت،

 

هەروەها هەوڵدان بۆ شکاندنی ئیرادەیان یان پەراوێزخستنی ڕۆڵیان لە بەرامبەر هۆشیاری و ڕێکخستنی ژنان بڕیاری شکستە، نوێکردنەوەی بەڵێننامە بۆ بەردەوامبوون لە بەرگریکردن لە شۆڕشی ژنان و پڕۆژەی ڕۆژئاوای کوردستان وەک نموونەیەک بۆ ڕزگاریخوازی و دادپەروەری کۆمەڵایەتیە.