ژنانی دەستڕەنگین پارێزەری جلی نەتەوەیی کوردیین
بۆ پارێزگاری کردن لە جلی نەتەوەیی، ژنانی نەتەوە جیاوازەکان جلوبەرگی کولتووری خۆیان دەپاریزن و ژنانی کوردو سنووری کۆیەش هەمیشە لە هەوڵدان بۆ ئەوەی جلوبەرگی نەتەوەییان لەناونەچێت.
شیا کۆیی
کۆیە-جلی کوردی یەکێکە له كولتووره جوانه‌كانی نه‌ته‌وه‌ی كورد، هه‌رنه‌ته‌وه‌یه‌ك به جلوبه‌رگ و کولتووره‌كه‌ی ناسراوه‌و وناسنامه‌ی نه‌ته‌وه‌ییه، كوردیش لە جلی کوردی پیشه‌نگه كه به‌جلێكی جوان و پۆشاكێكه كه قه‌ت سه‌رده‌می به‌سه‌رناچێت، ئه‌وه‌ی جێی خۆشحالیه ژنانی ده‌ستره‌نگین هه‌میشه گرنگی به‌و جل و دابونه‌ریتی پۆشاكی كوردی ده‌ده‌ن و رۆژ له‌دوای رۆژ كاری جوانتر ده‌كه‌ن.
هەرچەندە قەیرانی دارایی لە باشووری کوردستان تادێت خراپتر دەبێت و کاریگەری لەسەر بازاڕو هەموو بوارێکی ژیان کردووە، بەڵام خواست لەسەر جلی کوردی وەک خۆیەتی و خاوەنکارەکانیش نرخیان دابەزاندووەو ڕەچاوی باری ئابووری خەڵک دەکەن.
بێخاڵ محێدین، دانیشتوی شاری كۆیه‌یه، پیشه‌ی مامۆستایه له‌گه‌ڵ ئه‌وه‌ش دیزاینه‌ری جلی كوردیه‌و هەمیشە لە هەوڵی پاراستنی جلی کوردیدایەو بەشداری فێستیڤالەکان دەکات بۆ ناساندی کارەکانی، ئاماژەی بەوەکرد، کە قەیرانی دارایی و دواکەوتنی موچە کاریگەری لەسەر نرخی کاڵاکان کردوەو جاران گه‌ر كڵاوێكی به ٢٥ هه‌زار ده‌فرۆشت ئیستا به ١٥ هه‌زار دەیفرۆشێت و دیاریەکیشی لەگەڵدا پیشکەش بە کڕیارەکە دەکات.
کڵاوی ناوچە جیاوازەکان دروست دەکات
وتیشی: وه‌ك حه‌زوو خولیایه‌كی خۆم حه‌ز دەکەم ئه‌وشتانه‌ی كه دروستیان ده‌كه‌م پێشكه‌ش به‌خه‌ڵكیان بكه‌م، شته‌كانی من زیاتر كڵاوی سه‌رجلی كوردیه به‌هه‌موو جۆره‌كانی وه‌ك كڵاوی كۆیی وهه‌ولێریی و ناوچه‌ی بادینان و سلێمانی وه‌ك ئه‌وه‌ی سه‌ری خۆم.
"نابێت جلی کوردی بشێوێندرێت"
جه‌ختی له‌وه‌كرده‌وه كه جلی كوردی ناسنامه‌ی كوردایه‌تییه‌م مۆركی كوردایه‌تیه وتی: ئه‌وجلە‌ی له‌به‌رمه شێوازی كوردیه وهیچ شێوازێكی فارسی و توركیمان تێنه‌كردووه، بۆیه ده‌بێت جلی كوردی وه‌كو خۆی بێت نه‌ك هه‌یه ده‌سماڵی لێكراوەتەوە یان شێوێندراوه یان قۆڵی كورتكراوه‌ته‌وه، من له‌گه‌ڵ ئه‌وانه نیم پێویسته به شێوازی خۆی بێت و ته‌واو.
بێخاڵ محێدین ڕونیشیكرده‌وه كه هه‌لی كار بۆگه‌نجان نییه دامه‌زراندن نییه بۆیه گرنگه ژن گرنگی به‌تواناكانی خۆی بدات بە لەماڵ بێنە دەرەوە بابه‌ته‌كانی خۆیان نمایش بكەن، داهاتێك بۆخۆیان كۆبكەنەوە.
"گرنگە جلی کوردی بە شێوازە جوانەکەی خۆی بمێنێتەوە"
ژیان محەمەد دانیشتووی شاری سلێمانی، كاری ده‌ستی ده‌كات بۆ جلی كوردی و به جله كوردییە‌كان به‌شداری له پیشانگاو فێستیڤاڵه‌كان ده‌كات سه‌باره‌ت به گرنگی دیزاینی جلی كوردی وتی: زۆر گرنگه له‌م سه‌رده‌مه‌دا گرنگی به‌جلی كوردی بدرێت، به شێوازه جوانه‌كه‌ی خۆی بمێنته‌وه، ئه‌وجلكانه‌ی من هه‌موی كاری ده‌ستی خۆمه ، ئیمه وه‌ك گروپی تامو چێژ به‌شداری له فێستیڤاڵ ده‌كه‌ین و خۆمان به‌شداری به جله‌كان ده‌كه‌ین تا نمایشیان بكه‌ین بۆ گه‌شتیاران و ده‌مانه‌وێت كولتووری كوردی ونه‌ته‌وه‌ی گه‌لی كورد به خه‌ڵكی ده‌ره‌وه‌ش بناسێنین له ریگای ئه‌م فیستیڤاڵانه‌وه..
لەکۆتایی قسەکانیدا وتی: من خۆم فه‌رمانبه‌رم و ئه‌وكارانه‌ش ده‌كه‌م، پێموایە هه‌موو ژنێك تواناو به‌هره‌یه‌كی تێدایه گه‌ر ده‌ری بخات، جا له دیزاینی جلوبه‌رگ بێت یان خواردن یان كاری ده‌ستی، به‌م شێوه هه‌م كاره‌كه‌ی ده‌رده‌خات هه‌م بژێوی ژیانی دابین ده‌كات.