ژنان و ڕۆژنامەنووسان لە نیالا دەستگیرکران ڕێکخراوەکانی ژنان داوای ئازادکردنیان دەکەن
دوای ئەوەی بەشدارییان لە وۆرکشۆپێکی تایبەت بە مافەکانی ژنان کرد کە لەلایەن ڕێکخراوە ناوخۆییەکانەوە ڕێکخرابوو، هێزەکانی پشتیوانی خێرا لە شاری نیالا لە باشووری دارفور، ژمارەیەک ژنیان دەستگیر کرد.
سودان
لەگەڵ زیادبوونی فرێکوێنسیی پێشێلکارییەکان بەرامبەر بە خەڵکی مەدەنی لە سودان لە سەرەتای شەڕەکەوە، ڕاپۆرتەکانی مافی مرۆڤ دەستگیرکردنی ژمارەیەکی زۆر لە ژنانیان لە چەند ناوچەیەکدا بەڵگە کردووە، ئەم دەستگیرکردنانە لە هەلومەرجێکی ناڕوون و بەبێ ڕێوشوێنی پێویست ئەنجامدراون، ئەمەش نیگەرانییەکان لەبارەی بارودۆخی ژنانی دەستبەسەرکراو زیاتر کردووە.
هێزەکانی پشتیوانی خێرا لە شاری نیالا لە باشووری دارفور لە ڕۆژئاوای سودان، ٦ی ئادار چەند ژنێکی دەستگیرکرد، لەنێویاندا ڕۆژنامەنووسان هەن، ئەو ژنانە بەشدارییان لە وۆرکشۆپێکدا کردبوو کە لەلایەن ڕێکخراوەکانی "ڕۆژنامەنووسان بۆ ئاشتی" و "ئێمە قسە دەکەین" بە هاوکاری ڕێکخراوی گەشەپێدانی ژنانی سودان ڕێکخرابوو، لە وۆرکشۆپەکەدا باس لە مافەکانی ژنان لە ڕێککەوتننامە نێودەوڵەتییەکان و یاسا نیشتمانییەکان و بەتایبەتی بڕیارنامەی ١٣٢٥ی ئەنجومەنی ئاسایشی نەتەوە یەکگرتووەکان کرا.
نزیکەی ٢٥ ژن بەشدارییان لە وۆرکشۆپەکەدا کردووە، هێزەکانی ئاسایشی نیشتمانی سەر لە بەیانیدا لە ماڵەکانیانەوە دەستگیریان کردن، بە بەکارهێنانی زرێپۆش و کارمەندانی جل و بەرگی ئاسایی، دەستبەسەرکراوەکان بەبێ تۆمەت و دادگاییکردنیان گواستراونەتەوە بۆ زیندانەکان.
چەندین ڕێکخراوی ژنان لەوان ڕێکخراوی "نا بۆ چەوساندنەوەی ژنان" دەستگیرکردنی ژن و ڕۆژنامەنووسانیان لە نیالا شەرمەزار کرد، ئەوان داوایان لە هێزەکانی پشتیوانی خێرا کرد کە دەستبەجێ هەموو ئەو ژنانەی لە زیندانەکانیان دەستبەسەرکراون ئازاد بکەن.
ڕێکخراوەکانی ژنان نیگەرانی خۆیان بۆ تەندروستی و پارێزراوی دەستبەسەرکراوەکانی نیالا دەربڕی و بانگەوازیان بۆ ئازادکردنیان کرد، داوایان کرد کە ڕێگە بە پارێزەران بدرێت لەگەڵیان کۆببنەوە و چاودێری پزیشکی پێویست بۆ ئەو کەسانە بکرێت کە نەخۆشن، ئەم دەستگیرکردنانە هاوکات بوو لەگەڵ دەستگیرکردنی چەند کارمەندێکی نەخۆشخانەی سەربازی لە نیالا، کە بەبێ هیچ ڕوونکردنەوەیەک لەسەر هۆکاری دەستگیرکردنیان یان ئەو تۆمەتانەی کە ئاراستەیان کراوە، گواستراونەتەوە بۆ زیندانەکان