ڕۆژنامەنووسی میسری هیبا زیاد کۆچی دوایی کرد
هیبا زیاد، ڕۆژنامەنووسی میسری دوای دابەزینی توندی فشاری خوێن تووشی جەڵتەی دڵ بوو کۆچی دوایی کرد.
ناوەندی هەواڵ
هیبا زیاد، ڕۆژنامەنووسی میسری یەکێکە لە کەسایەتییە گرنگەکان و لە تەمەنە کورتەکەیدا جێپەنجەیەکی بەرچاوی بەجێهێشتووە. هیبا دەیان بەرنامەی هەمەچەشنی پێشکەش کرد، لەوانە بەرنامەی سیاسی، کۆمەڵایەتی، زانستی، هونەری و خێزانی.
هیبا زیاد ئەمڕۆ لەناکاو کۆچی دوایی کرد، ئەم زانیاریانە هەواڵێکی شۆککەر بوو بۆ ڕای گشتی و ڕاگەیاندن و کۆمەڵگەی هونەری.
ئاماژە بەوەکراوە، لە ئەنجامی دابەزینی توندی پەستانی خوێن و دواتر جەڵتەی دڵ گیانی لەدەستدا، بەبێ ئەوەی هیچ ئاگادارکردنەوە و نەخۆشییەکی هەبێت.
سەرچاوە نزیکەکان لە ڕۆژنامەنووسی گەنج هیبا زیاد ڕایانگەیاند، لە چەند ڕۆژی ڕابردوودا تووشی هیچ کێشەیەکی تەندروستی نەبووە و بە شێوەیەکی ئاسایی درێژەی بە کارە ڕۆژنامەوانییەکەی داوە.
سەرچاوەکان ئاماژەیان بەوەشکردووە، هەفتەی ڕابردوو نەیتوانیوە دوایین ئەڵقەی بەرنامەکە تۆماربکات، ئەمەش بووەتە هۆی پرسیارکردن لەسەر ئامادەنەبوونی لەناکاوی، پێش ئەوەی هۆکاری ئەم کارە ئاشکرابکرێت ئەمڕۆ گیانی لەدەستدا.