ناوەندی هەواڵ

 

ئاژانسی هەواڵی عێراقی بڵاویکردەوە، کە هایان عەبدولغەنی، وەزیری نەوتی عێراق ڕایگەیاندووە، پلان هەیە بۆ بەرزکردنەوەی ئاستی بەرهەمهێنانی کێڵگەی نەوتی ڕۆژهەڵاتی بەغدا بۆ زیاتر لە ٨٠ هەزار بەرمیل لە ڕۆژێکدا.

 

وەزارەتی نەوت لە بەیاننامەیەکدا ئاماژەی بەوەکردووە، هایان عەبدولغەنی سەردانێکی پشکنینی بۆ کێڵگەی نەوتی ڕۆژهەڵاتی بەغدا ئەنجامداوە.

 

عەبدولغەنی ڕوونیشیکردەوە، سەردانەکەی ئامانجی بەدواداچوونە بۆ ئەو پڕۆژانەی کە بەرهەمهێنان زیاد دەکەن و سوودمەندبوون لە غاز لەم کێڵگە نەوتییەدا کە یەکێکە لە گەورەترین کێڵگە نەوتییەکانی ناوچەکە، بە ڕێژەی بەرهەمهێنانی ئێستا کە ٣٠ هەزار بەرمیل لە ڕۆژێکدایە.

 

وەزیری نەوتی عێراق بە وردی باسی لەوەش کردووە، لوتکەی بەرهەمهێنان بەپێی گرێبەستێک کە لە ساڵی ٢٠١٨ لەگەڵ کۆمپانیای چینی ABS ئەنجام دراوە، بڕیارە بگاتە ڕێژەی بەرهەمهێنانی ٤٠ هەزار بەرمیل لە ڕۆژێکدا، بەڵام وەزارەت پلانی هەیە بۆ زیاتر لە ٨٠ هەزار بەرمیل لە ڕۆژێکدا بەرزبکاتەوە و بەرهەمهێنانی غاز بۆ ٥٠ ملیۆن مەتر سێجا زیاد بکات.

 

یەکێک لە گرنگترین ئامانجەکانی پەرەپێدانی ئەم کێڵگە نەوتییە، دابینکردنی بڕێکی پێویست سووتەمەنییە بۆ وێستگەکانی کارەبا، سەرۆکوەزیرانی عێراق لە مانگی شوباتی ساڵی ڕابردوودا پشتڕاستی کردەوە کە عێراق هەوڵدەدات لە ماوەی سێ ساڵدا بگاتە خۆبژێوی لە غاز.

 

سەرۆکوەزیرانی عێراق لەمیانی مەراسیمێکدا کە بۆ واژۆکردنی تا کۆتایی بەڕێوەچوو، وتی: " چاکسازی لە کەرتی نەوتدا لە وەبەرهێنانی گونجاوی سامانی نەوتدا نوێنەرایەتی دەکرێت و هاتنە ناوەوەی عێراق بۆ بازاڕی غازی جیهانی بژاردەیەکە کە پلانمان بۆ دانابوو و جێبەجێ دەکرێت و گرێبەستی مۆڵەتەکانی پەیوەست بە کێڵگە نەوتییەکان لە مانگی شوباتدا واژۆدەکرێت."

 

وەزارەتی نەوتی عێراق پێشتر ڕایگەیاندبوو، لە ماوەی مانگی ئاداردا بەرهەمهێنانی غاز زیاددەکرێت، جەختیشی لەوە کردەوە کە چەند پڕۆژەیەک بۆ کەمکردنەوەی ئەو غازەی پەیوەندیدارە کە لە ئۆپەراسیۆنە نەوتییەکاندا دەسووتێن، جێبەجێ دەکرێن.