ناوەندی هەواڵ

 

ئەنجومەنی ژنانی دەم پارتی ڕایگەیاند لە گەڕەکەکانی شێخ مەقسود و ئەشرەفیەی حەلەب، لە لایەن پاشماوەی چەتەکانی داعشەوە تاوانی گەورە بەرامبەر بە ژنان و خەڵکی مەدەنی ئەنجامدراوە و ئەو هێرشانەش درێژەپێدەری زیهنیەتێکی دژە ژنان و پیاوسالارانەیە. لە بەیاننامەکەدا هاتووە، ئەشکەنجەدان و سوکایەتی بەرانبەر جەستەی ژنان تاوانی جەنگە.

 

ئاماژەی بەوەشکردووە کە سیاسەتەکانی شەڕ لە مێژووەوە تا ئێستا بەزۆریی ژنانی کردووەتە ئامانج و ئەم هێرشانە ئامانجیان سەرکوتکردنی تێکۆشانی ژنانە بۆ ئازادی و یەکسانی، ئەنجومەنی ژنان کۆمەڵکوژییەکانی ڕۆژئاوا و شنگال لە دژی ژنانی بەبیرهێنایەوە و ڕایگەیاند کە دەستبەرداری تێکۆشان دژی ئەو زیهنیەتە نابن.

 

لەکۆتاییدا، بانگەواز لە کۆمەڵگەی نێونەتەوەیی و ڕێکخراوەکانی ژنان کراوە بەرانبەر ئەم تاوانانەی لە شێخ مەقسوود و ئەشرەفیە کراون بێدەنگ نەبن و پشتیوانی لە ژیانێکی ئازاد و یەکسان بۆ ژنانی سووریا بکەن.