یەکێتی ئەوروپا داوای پاراستنی هاوڵاتیانی مەدەنی و ڕاگرتنی دەستبەجێی سەرجەم هێرشەکان لە سووریا دەکات
بەرپرسی سیاسەتی دەرەوەی یەکێتی ئەوروپا داوای ڕاگرتنی دەستبەجێ و هەمەلایەنەی هەموو چالاکییە سەربازییەکانی سووریای کرد، جەختیشی لەسەر گرنگی پابەندبوون بە ئاگربەستی ئەم دواییە وەک هەنگاوێکی چارەنووسساز بۆ ڕێگریکردن لە تێکچوونی زیاتری دۆخەکە کرد.
ناوەندی هەواڵ
کایا کاڵاس، نوێنەری باڵای یەکێتی ئەورووپا بۆ کاروباری دەرەوە و سیاسەتی ئاسایش، داوای ڕاگرتنی دەستبەجێی هەموو چالاکییە سەربازییەکان لە سووریا کرد.
لە ڕاگەیاندراوێکدا لە ١٩ی کانوونی دووەم ڕایگەیاند: ئاگربەستی نێوان دەسەڵاتدارانی ڕاگوزاری سووریا و هەسەدە هەنگاوێکی گرنگە بۆ ئەوەی وڵاتەکە نەکەوێتە ناو ئاژاوەگێڕییەوە.
جەختیشی لەوە کردەوە، کە پێویستە بە تەواوی ڕێز لە پابەندبوونەکانی کەمکردنەوەی پەرەسەندن بگیرێت و "دەبێت هاوڵاتیانی مەدەنی بپارێزرێن."
دووپاتی کردەوە، ئامانجی یەکێتی ئەوروپا وەک گواستنەوەیەکی سیاسی ڕاستەقینە و گشتگیر لە سووریادا دەمێنێتەوە، هەروەها بەدیهێنانی ئەم ئامانجە پێویستی بە یەکخستنی دامەزراوە سەربازی و ئاسایش و مەدەنییەکان هەیە لەناو پێکهاتە یەکگرتووەکانی دەوڵەتدا، لەگەڵ بەشداریکردنی سیاسی و ناوخۆیی واتادار و کاریگەر، پاراستنی تەواوی مافەکانی کورد گرنگییەکی سەرەکیی هەیە.
کایا کاڵاس لە کۆتاییدا، وتی: پێویستی پابەندبوون بە چارەسەرە سیاسییەکانە کە مسۆگەری سەقامگیری بەردەوام و یەکگرتوویی سووریا بکەن.