سلێمانی

 

ئەمڕۆ سێ ڕۆژە، فەرمانبەران و مامۆستایانی زانکۆی سلێمانی بەهۆی پێنەدانی موچەکانیان لەبەردەم کامپی نوێی زانکۆی سلێمانی گردبوونەوە و ڕێگای سەرەکی سلێمانی-کەرکوکیان داخست، خوێندکارانی زانکۆش لە گردبوونەوەی ئەمڕۆدا بەشدارییان کرد و داوای مافی مامۆستاکانیان کرد.

 

ماوەی دوو ڕۆژە مامۆستایان و فەرمانبەرانی کامپی کۆنی زانکۆی سلێمانی، فەرمانبەرانی بەڕێوبەرایەتی گشتی ڕۆشنبیریی سلێمانى چوونە بەردەم بانکی هەرێم، مامۆستایانی زانکۆی گەرمیان، فەرمانبەرانی شاری هەڵەبجە گردبوونەوە و ناڕەزایەتییان دەربڕی.

 

ئەمە لەکاتێکدایە بەپێی خشتەی بڵاوکراوەی مووچە لەلایەن وەزارەتى دارایی حکومەتى هەرێمى کوردستانەوە، دەبوایە پێش جەژنى ڕەمەزان مووچەى فەرمانبەران و مووچەخۆرانى سەرجەم وەزارەتەکان دابەشبکرایە، بەڵام بەبیانووى نەبوونى پارە لە بانکەکانى سنوورى سلێمانى، مووچەى چەند وەزارەتێک لەگەڵ خانەنشینان دابەشنەکرا.