ئەڤین جبرائیل

 

کۆیە- ڕۆژی پێنجشەممە، بە درووشمی تەقتەق بوکی ڕازاوەی کەنار زێی بچووک دووهەمین فیستیڤاڵی هەنجیر دەستیپێکرد کە بۆ ماوەی سێ ڕۆژ بەردەوام دەبێت.

 

بە بەشداری ژنان لە سەرجەم شار و شارۆچکەکانی هەرێمی کوردستان هەولێر، سلێمانی، تەقتەق، پێنجوێن، قەڵادزێ کۆیە، دووهەمین فیستیڤاڵی هەنجیر لە شارۆچکەی تەقتەق بەڕێوەچوو.

 

 لە فیستیڤاڵەکەدا ژنان بەرهەمی کاری دەستی خۆیان، بەرهەمی خۆماڵی و خواردن و شیرینی هەروەها بە نمایشکردنی جلوبەرگی ڕەسەنی کوردی بەشداربوون، ژنانی خاوەنپێداویستی تایبەت بەشداری فیستیڤاڵەکەیان کردبوو بەرهەم و کارە دەستییەکانی خۆیان نمایشکرد و ئاماژەیان بەوەکرد کە بووەتە سەرچاوەی پەیداکردنی بژێوی ژیانیان.

 

ناوچەی تەقتەق خاکێکی شیاو و گونجاوی هەیە بۆ بەرهەمهێنانی هەنجیر، ئەم فیستیڤاڵەش ساڵانە بۆ پاڵپشتی و ناساندن  و بەبازاڕکردنی بەرهەمی جووتیارانی شارۆچکەی تەقتەق ڕێکدەخرێت، لەم ڤیستیڤاڵەدا جگە لە نمایشکردنی بەرهەمی هەنجیری جۆراوجۆری زیاتر لە ٦٠ جوتیاری ناوچەکە، چەندین بەروبووم و کاری دەستی دیکە نیشاندەدرێن.