پێشانگایەکی شێوەکاری لە سلێمانی کرایەوە و ٣٠ ژنی شێوەکار بەشداربوون
بە مەبەستی زیاتر تێکەڵکردنی کلتوور و هونەر ڕێکخراوی فادیا بۆ ڕۆشنبیریی و هونەریی شەشەم پێشانگای شێوەکاری لە شاری سلێمانی بۆ ٥٠ شێوەکاری کورد و عەرەب کردەوە، کە ٣٠ لەو هونەرمەندانە شێوەکارانی ژنن.
ناوەندی هەواڵ
ئەمڕۆ ٢١ی تەمووز، لە هۆڵی مۆزەخانەی سلێمانی، لەلایەن ڕێکخراوی فادیا بۆ ڕۆشنبیریی و هونەریی، پێشانگایەکی شێوەکاری بۆ هونەرمەندانی کورد و عەرەب کردەوە.
ئەمە شەشەم پێشانگای شێوەکاری ڕێکخراوەکەیە لە شاری سلێمانی کە ٥٠ شێوەکار تێیدا بەشداربوون و ٣٠ لەو هونەرمەندانە شێوەکارانی ژنن.
ڕێکخراوی فادیا، ڕێکخراوێکی ڕۆشنبیریی و هونەرییە، کە تێدا ساڵانە پێشانگای شێوەکاریی بۆ شێوەکارەکانی ناوخۆ و دەرەوەی عێراق ڕێکدەخات، ئامانج لێی هاندانی شێوەکارەکانە بۆ بەردەوامبوونیان لە کارە هونەرییەکان.