ناوەندی هەواڵ

ئەلێکیا ڕۆمێرۆ، وتەبێژی سەرۆکایەتی پەرلەمانی کەتەلۆنیا، بە پاڵپشتی زۆرینەی فراکسیۆنەکانی پەرلەمان، سەبارەت بە هێرشە داگیرکارییەکانی دەوڵەتی تورک بۆسەر باشووری کوردستان بەیاننامەیەکی بڵاوکردەوە.

 

لە بەیاننامەکەدا هاتووە: "ئەردۆغان لە هەوڵی ئەوەدایە ببێتە نێوەندگیری شەڕی ئۆکرانیا و هەوڵدەدات وەک کەسێکی ئاشتیخواز خۆی نیشان بدات، لەهەمان کاتدا هێرشێکی داگیرکاریی بەرفراوانی لەدژی باشووری کوردستان دەستپێکردووە، ئامانجی دەوڵەتی تورک چۆڵکردنی ئەو ناوچەیەیە لە خەڵک و پاشان داگیرکردنیەتی، پرەنسیپی سەرەکی دەوڵەتی تورک و ئەردۆغان سیاسەتی نکۆڵیکردن و شەڕکردنە لە دژی گەلی کورد و هەوڵەکانی نێوەندگیری ئەردۆغانیش شاردنەوەی سیاسەتی شەڕ و جینۆسایدە لەسەر کوردستان و ناوچەکە".

 

لە کۆتایی بەیاننامەکەشدا چەند خاڵێکی بانگەوازیی ئاڕاستەی جیهان کراوە بۆ هەڵوێست وەرگرتن دژی داگیرکارییەکانی دەوڵەتی تورک:

 

– داوا لە نەتەوە یەکگرتووەکان و ناتۆ و یەکێتی ئەوروپا و ئەنجومەنی ئەوروپا و کۆمکاری عەرەبی و هەموو حکومەت و ڕێکخراوە نێودەوڵەتییەکان دەکەین، لەدژی هێرشی نا یاسایی دەوڵەتی تورک لەسەر ناوچەکانی ئەشکەوتی برینداران و کورەژارۆ  و چیا ڕەش و زاپ لە باشووری کوردستان، بە زوترین کات هەڵوێست وەرگرن.

 

– هاوپەیمانی سیاسی یەکێتی ئەوروپا و وڵاتانی ئەندام لەگەڵ تورکیا شەرمەزار دەکەین و داوا لە دەوڵەتی ئیسپانیا دەکەین کە کەرەستە و کەلوپەلی سەربازی بە دەوڵەتی تورک نەفرۆشێت.

 

– ئێمە بە ئاشکرا ئیدانەی ئەو هێرشە دەکەین و دەڵێین، کە پێویستە تورکیا هێزەکانی لە باشوری کوردستان بکشێنێتەوە.

 

– بانگەوازیمان بۆ لایەنە سیاسییەکان، ڕێکخراوەکانی مافی مرۆڤ، ڕێکخراوە ئاشتیخوازەکان، سەندیکاکان و چالاکوانان ئەوەیە کە لە بەرامبەر دەستدرێژییەکانی دەوڵەتی تورکدا بوەستنەوە.

 

– ئێمە پارێزگاری لە ڕەوایەتی ئەو پارتە کوردییانە دەکەین، کە بۆ پاراستنی بەرژەوەندی و ماف و ئازادییەکانی هاوڵاتیانی کورد بە شێوەیەکی دیموکراسیانە تێدەکۆشن.