پلاتفۆرمی ژنانی ڕۆژهەڵاتی کوردستان بانگەوازیی بۆ بەشداریکردن لە مانگرتنی گشتی دەکات
پلاتفۆرمی ژنانی ڕۆژهەڵاتی کوردستان ـ ژینا ڕایگەیاند، شۆڕشی “ژن، ژیان، ئازادی” کۆتایی پێنەهاتووەو هەتا بەدیهێنانی مافە ڕەواکان بەردەوام دەبێت، داوا لە ئازادیخوازانی کوردستان، ژنان و گەنجانی پێشەنگ دەکەین، کە ڕۆژی ٢٥ـی خەرمانان، بەشداریی لە مانگرتن بکەن.
ناوەندی هەواڵ
پلاتفۆرمی ژنانی ڕۆژهەڵاتی کوردستان-ژینا لە چوارەمین ساڵیادی شەهیدکردنی ژینا ئەمینی و شۆڕشی “ژن، ژیان، ئازادی” ڕاگەیاندراوێکی بڵاوکردەوە.
دەقی ڕاگەیاندراوەکە بەمشێوەیەیە:
”ژینا؛ ناوی شۆڕشێک کە هێشتا بەردەوامە.
”ژن، ژیان، ئازادی”.
ژنانی ئازا و تێکۆشەر، چوار ساڵ بەسەر شەهیدکردنی ژینا ئەمینی تێدەپەڕێت، لەو ڕۆژەی کە کچێکی کورد لە سەقز بوو بە دەستپێکی شۆڕشێکی کۆمەڵایەتی و سیاسی، کە سنوورەکانی ئێرانی تێپەڕاند و دەنگی ئازادیخوازیی گەیاندە جیهان.
”ژن، ژیان، ئازادی” تەنیا درووشمی ناڕەزایەتی نەبوو، بەڵکوو دەنگی راپەڕینێک بوو دژی سیستەمێک کە ساڵانێکە بە سەرکوت، جیاوازی، سێدارە، کپ کردنی دەنگەکان، زیندان و پێشێلکردنی مافە بنەڕەتییەکانی مرۆڤ، بە تایبەتمەندی ژنان، دەسەڵاتی خۆی بەسەر کۆمەڵگەدا سەپاندووە.
ڕاپەرینی ژن، ژیان، ئازادیی لە شەقامەکانی کوردستانەوە سەریهەڵداو لە ماوەیەکی کورتدا توانی هاوپەیوەندییەکی بێوێنە لە نێوان ژنان، خوێندکاران، کرێکاران، نەتەوەکان و توێژە جیاوازەکانی کۆمەڵگە دروست بکات؛ هەموو ئەوانەی کە خوازیاری ژیانێکی ئازاد، دادپەروەر و بەکەرامەت بوون.
ئەمڕۆ، لە چوارەمین ساڵیادی شەهیدکردنی ژینا، ئێران بە قۆناغێکی هەستیار و قورسدا تێدەپەڕێت، قەیرانی ئابووری، گرانی و ناڕوونییە سیاسییەکان، ژیانی خەڵکی زیاتر لە هەر کاتێک دژوارتر کردووە. لە هەمان کاتدا، دەسەڵات هێشتا بەردەوامە لە سەرکوتی دەنگە ناڕازییەکان و زیادکردنی فشار لەسەر ژنان، چالاکوانان و هەموو ئەوانەی کە داوای گۆڕان دەکەن.
بزووتنەوەی ژینا تەنیا ناڕەزایەتییەک لە دژی باڵاپۆشی زۆرەملێ و پۆشاکی زۆرەملێ نەبوو؛ بەڵکوو هەوڵێکی گەورە بوو بۆ هەڵتەکاندنی بناغەکانی سیستمێک کە هەناسەی ئازادیی لە هیچ توێژێکی کۆمەڵگە نەهێشتووەتەوە. ئەم بزووتنەوەیە دەرخەری هۆشیاریی قوڵی ژنان بوو و بووە خاڵێكى وەرچەرخان لە مێژووی خەباتی ژنانی کورد و گەلانی ئێران بە گشتی.
لە گرینگترین تایبەتمەندییەکانی ئەم سەرهەڵدانە ئەوە بوو کە ژنی کورد بوو بە داینەمۆی راپەڕینێکی بەرفراوان و هەڵگری درووشمێک کە واتای ئازادی، یەکسانی و ژیان لە خۆدا کۆکردبووەوە؛ درووشمێک کە ژنانی سەرانسەری ئێرانیش خۆیان تێدا بینییەوە و کردیان بە هێمای خەباتی هاوبەشیان. پلاتفۆرمی ژنانی ڕۆژهەڵاتی کوردستان-ژینا، لەم ڕۆژەدا سەری ڕێز دادەنێت بۆ یادی ژینا ئەمینی و هەموو ئەو شەهیدانەی کە لە پێناوی ئازادی و کەرامەتی مرۆڤدا گیانیان بەخت کردووە.
لەم چوارچێوەیەدا، وەک پلاتفۆرمی ژنانی ڕۆژهەڵاتی کوردستان-ژینا، وێڕای پشتگیریی تەواو لە بڕیار و بانگەوازی هاوپەیمانیی حزبە سیاسییەکانی ڕۆژهەڵاتی کوردستان، داوا لە جەماوەری وشیار و ئازادیخوازی کوردستان، بەتایبەتی ژنان و گەنجانی پێشەنگ دەکەین، کە ڕۆژی ٢٥ـی خەرمانان، بە بەشداریی چالاکانە لە مانگرتنی گشتیدا و بە داخستنی دووکان و بازاڕەکان و ڕاگرتنی چالاکییە ڕۆژانەییەکان، یادی شەهیدان بەرز ڕابگرن و ئیرادەی بەرزی خۆیان بۆ بەردەوامیی شۆڕش نیشانی کۆمەڵگەی نێودەوڵەتی و ڕژێمی داگیرکەر بدەن.
هەروەها بانگەواز لە کۆمەڵگەی مەدەنی، ڕێکخراوە نێودەوڵەتییەکانی مافی مرۆڤ و سەرجەم ژنانی ئازادیخواز دەکەین کە:
- بەردەوام بن لە تێکۆشان و بەهێزکردنی یەکگرتوویی لە دژی هەموو شێوازەکانی سەرکوت و ستەم.
- فشارە نێودەوڵەتییەکان بۆ سەر ڕژێم زیاد بكرێن و کردەوە سەرکوتکارییەکان، لەسێدارەدانەکان و دەستبەسەرکردنی ناڕەوای چالاکوانان بە توندی شەرمەزار بكرێن.
- پشتگیری لە خواستە ڕەواکانی ژنانی کوردستان و گەلانی ژێردەستی ئێران بكرێت، بۆ دەستەبەرکردنی مافە بنەڕەتییەکان و ئازادییە ڕاستەقینەکان.
ئێمە دووبارە جەخت لەسەر ئەوە دەکەینەوە کە: شۆڕشی “ژن، ژیان، ئازادی” کۆتایی پێنەهاتووە، ئەم ڕاپەڕینە لە هۆشیاریی ژنان، لە ویستی ئازادی، لە خەونی دادپەروەری و لە خواستی گۆڕانی کۆمەڵگەدا هێشتا زیندووە و تا گەیشتن بە مافە ڕەواکان و هەڵتەکاندنی سیستەمی زۆرداری و داگیرکاری بەردەوامە”.