ناوەندی هەواڵ

 

فرانزیسکا ستێر. سکرتێری گشتی پارتی باستا کە پارتەکەیان لە بواری ئیکۆلۆژی، فێمینستی و سۆسیالیستییدا کار و خەبات دەکەن، بەناوی پارتەکەیەوە بەشداری کەمپینی "دەمەوێت لەگەڵ ئۆجالان دیدار بکەم" بوو. هەڵمەتەکە لەسەر ئاستی نێودەوڵەتی  لەلایەن کۆڕبەندی ئاشتی و ئازادی ئەوروپا "EFFP"ەوە دەستپێکراوە و ئامانجی هەڵمەتەکە دیدارکردنە لەگەڵ ڕێبەری گەلی کورد عەبدوڵا ئۆجالان، هەڵمەتەکە لە قۆناغی یەکەمییدا لەسەر ئاستی کەسایەتی و پارت و ڕێکخراوە نێودەوڵەتییەکان ئەنجام دەدرێت.

 

 فرانزیسکا ستێر بۆ ئەم مەبەستە نامەیەکی ئاڕاستەیی وەزارەتی دادی تورکیا کرد و دواکاری بۆ ڕۆشتنە ئیمراڵی کردووە، لە نامەکەدا کە لە ٧ی حوزەیرانی ٢٠٢٥دا نێردراوە، ئاماژە بە کاریگەر و دەنگدانەوەی 'بانگەوازی ئاشتی و کۆمەڵگەی دیموکراتیک'ـی ٢٧ی شوباتی ڕێبەری گەلی کورد عەبدوڵا ئۆجالان کراوە لە ئاستی نێونەتەوەییدا و بە بانگەوازییەکی مێژوویی بۆ چارەسەری و هێنانەئارای ئاشتی پەسن کراوە.

 

فرانزیسکا ستێر ئاماژەی بەوەدا بانگەوازیییەکی ڕێبەری گەلی کورد بۆ بونیاتنانی جێگەیەکی شایستە بەژیان هەلێکی مێژووییە و وتی: "تاوەکوو چاوم بە بەڕێز ئۆجالان نەکەوێت، ناتوانم بە قوڵی و کاریگەرتر لە فیکر و ڕوانگەکانی تێبگەم.". فرانزیسکا ستێر دەستنیشانی کرد ئامانجەکەی لە بەشداری کەمپینەکە بۆ ئەم هۆکارە دەگەڕێتەوە و هیوایی خواستووە بە بێ هیچ ڕێگرییەک بتوانێت ڕێبەر ئاپۆ ببینێت.

 

فرانزیسکا ستێر جەختی لە پێویستی ڕەخساندنی هەلومەرجەکانی بانگەوازییەکی ڕێبەر کردووەتەوە و وتی: بۆ ئایندەی تورکیا، کوردستان و ڕۆژهەڵاتی ناوەڕاست پێویستە چارەسەری یەکسانی و دیموکراتیکی بڕەخسێندرێت.