نەتەوە یەکگرتووەکان: پچڕانی پەیوەندییەکان ژنانی ئەفغانی لە مافە سەرەتاییەکانیان بێبەش کرد
وەزارەتی کاروباری ژنانی ڕێکخراوی نەتەوە یەکگرتووەکان ڕاپۆرتێکی بڵاوکردەوە و ئاشکرای دەکات کە پچڕانی پەیوەندی و ئینتەرنێت لە ئەفغانستان دەرئەنجامی ترسناکی لەسەر ژیانی ژنان هەبووە، ئەمەش بووەتە هۆی بێبەشکردنی دەستڕاگەیشتن بە پشتیوانی و داهات و خوێندن.
ناوەندی هەواڵ
ژنان لە ئەفغانستان دوای پچڕانی خزمەتگوزارییەکانی ئینتەرنێت و پەیوەندییەکان ڕووبەڕووی ئاستەنگەکان دەبنەوە، ئەم پچڕانە بووەتە هۆی بێبەشکردنی خوێندن و داهات و پشتیوانی و گۆشەگیرییانی قووڵتر کردووەتەوە و ڕاستەوخۆ کاریگەری لەسەر ژیانی ڕۆژانەیان دروستکردووە.
نوسینگەی هەرێمی ژنانی نەتەوە یەکگرتووەکان بۆ ئاسیا و زەریای هێمن ڕۆژی ٢٨ی تشرینی دووەم ڕاپۆرتێکی بڵاوکردەوە و ئاشکرای کرد کە تاڵیبان لە ئەفغانستان لە نێوان ٢٩ی ئەیلوول تا ١ی تشرینی یەکەم بۆ ماوەی ٤٨ کاتژمێر خزمەتگوزاری ئینتەرنێت و پەیوەندییەکانی پچڕاندووە.
ڕاپۆرتەکە ڕوونیکردەوە کە ئەم پچڕانە هەستی ترس و گۆشەگیریی توندتر کردووە، بەشداربووە لە بڵاوبوونەوەی زانیاری هەڵە و لێکەوتەی ڕاستی لەسەر ژیانی ژنان هەبووە و بێبەش بووە لە دەستڕاگەیشتن بە پاڵپشتی و داهات و خوێندن و پەیوەندیکردن.
لە ڕاپۆرتەکەدا بە تایبەتی تیشکی خراوەتە سەر پەککەوتنەکانی بەرنامە مرۆییەکان و دابینکردنی پێداویستییە سەرەتاییە مرۆییەکان، هەروەها ئاماژەی بەوەشکردووە، پچڕانی بەربڵاوی تۆڕەکانی تەلەفۆن و ئینتەرنێت و لەکارکەوتنی تاکە هێڵی گەرمی نیشتمانی کە خزمەتگوزاری پێشکەش بە زیانلێکەوتوانی توندوتیژی ڕەگەزی دەکات.
نووسینگەی هەرێمی ژنانی نەتەوە یەکگرتووەکان جەختی لە بەهێزکردنی توانای ئامادەکاری و وەڵامدانەوەی خێرا بۆ ئەو ڕێکخراوانەی کە لە ئەفغانستان کاردەکەن، هۆشداریدا لەوەی کە ئەم جۆرە پچڕانە بەربڵاوانە کاریگەرییەکی زۆری لەسەر ژیانی ژنان و جێبەجێکردنی بەرنامەکانی پشتیوانی دەبێت.
نەتەوە یەکگرتووەکان جەختی لەوە کردەوە، کە دەستڕاگەیشتن بە دیجیتاڵی بۆ ژنان پێویستییەکی بنەڕەتی و ئاماژەیەکی پاراستنە نەک شتێکی خۆشگوزەرانی و داوای زیادکردنی پشتیوانی بۆ ژنان لە ئەفغانستان کرد لە ماوەی ١٦ ڕۆژی چالاکی بەرەنگاربوونەوەی توندوتیژی ڕەگەزی.