ناوەندی هەواڵ

 

ناڕەزایەتییەکان لە ڕۆژهەڵاتی کوردستان و ئێران لە چواردەیەمین ڕۆژدایە، لە کاتێکدا پەیوەندییەکان و ئینتەرنێت لە پچڕان، ئەمەش نیگەرانییەکی بەرفراوانی لێکەوتەوە.

 

چەندین شاری ڕۆژهەڵاتی کوردستان و ئێران لەوان تاران، مەشهەد، تەبرێز و قوم، ئێوارەی ٩ی کانوونی دووەم، سەرەڕای بەردەوامیی پچڕانی ئینتەرنێتی سەرتاسەری، شەپۆلێکی نوێی ناڕەزایەتی دژ بە حکومەتی بەخۆیەوە بینی.

 

لە گرتە ڤیدیۆییەکاندا خەڵکێکی زۆر ڕژانە سەر شەقامەکانی پایتەخت، خۆپیشاندەران دروشمی دژە ڕژێمیان دەوتەوە، لەوانە "مەرگ بۆ خامنەیی"، هەندێکیان پەنایان بردە بەر لێدانی مەنجەڵ و لێدانی هۆڕنی ئۆتۆمبێل بۆ دەربڕینی ناڕەزایی خۆیان.

 

بەگوێرەی ڕاپۆرتەکانی مافی مرۆڤ، سەرکوتکردنی ئاسایشی لەدوای دەستپێکردنی خۆپیشاندانەکانەوە لە ۲٨ی کانونی یەکەمەوە، ٥١ کەس گیانیان لەدەستداوە، لەنێویاندا منداڵ، سەدان کەسیش بەسەختی برینداربوون، هەندێکیان گوللـەی لاستیکیی پۆشراو بە چاو و سەریانەوە تەقێندراوە.

 

ڕێکخراوە نێودەوڵەتییەکان لەوان ڕێکخراوی لێبوردنی نێودەوڵەتی و هیومان ڕایتس وۆچ، بەکارهێنانی هێزی کوشندەیان لە دژی خۆپیشاندەران شەرمەزار کرد و جەختیان لەوە کردەوە، کە دەسەڵاتدارانی ئێران سیاسەتێکی سیستماتیکی تۆقاندن و سزادانی خۆپیشاندەرانی ئاشتیانە بەکاردەهێنن، ئەو ڕێکخراوانە داوایان لە کۆمەڵگەی نێودەوڵەتی کرد کە سەرکۆنەی پێشێلکارییەکان بکەن و هەنگاوی بەپەلە بگرنەبەر بۆ ڕاگرتنی خوێنڕشتن و دەستەبەرکردنی لێپرسینەوە.

 

هەروەها ڕێکخراوەکانی مافی مرۆڤ دەستگیرکردنی بەرفراوان و ئارەزوومەندانەیان بەڵگە کردووە، لەنێویاندا منداڵانی تەمەن ١٤ ساڵ، لە کاتێکدا ترسی ئەشکەنجەدان و بێسەروشوێنکردنی زۆرەملێیان هەبووە، شیرین عبادی، خاوەنی خەڵاتی نۆبڵی ئاشتی ئێران، هۆشداریی دا لە ئەگەری کۆمەڵکوژی لە لایەن هێزەکانی ئاسایشەوە لەژێر پچڕانی پەیوەندییەکاندا، وتی: پچڕانی ئینتەرنێت تاکتیکێکی بە ئەنقەستە بۆ داپۆشینی سەرکوتکردن.

 

بەکارهێنەرانی تۆڕی کۆمەڵایەتی بارودۆخی ڕۆژهەڵاتی کوردستان و ئێرانیان بە "خراپتر لە شەڕی ١٢ ڕۆژە" پێناسە کرد و ئاماژەیان بەوە کرد، کە پچڕانی ئینتەرنێت پەیوەندی لەگەڵ خێزان و هاوڕێیان نزیک بوو لە مەحاڵ و دڵەڕاوکێ و ترسی زیاتر کرد.

 

شارەزایانی بواری مافی مرۆڤ دووپاتیان کردەوە، کە پچڕانی ئینتەرنێت پێشێلکردنی ڕوون و ئاشکرای مافە بنەڕەتییەکان و بێبەشکردنی هاوڵاتیانە لە ئازادی ڕادەربڕین و دەستڕاگەیشتن بە زانیاری و بەشداری سیاسی، بەپێی ماددەی ١٩ی پەیماننامەی نێودەوڵەتی مافە مەدەنی و سیاسییەکان، هەموو کەسێک مافی ئەوەی هەیە زانیاری بگوازێتەوە و وەریبگرێت "لەلایەن هەر میدیایەکەوە"، کە ئینتەرنێتیش دەگرێتەوە.

 

لە پێشهاتێکی پەیوەندیداردا، پێنج ڕێکخراوی ژنان لە ڕۆژهەڵاتی کوردستان، سوپاس و پێزانینی خۆیان بۆ پاڵپشتی بەربڵاوی گشتی، بۆ مانگرتنی گشتی دەربڕی و جەختیان لەوە کردەوە، کە بەشداری دانیشتووان و دوکاندارەکان لە داخستنی فرۆشگاکانیان نیشانەی هۆشیاری کۆمەڵایەتی و هاوپشتی مەدەنییە بەرامبەر بە سیاسەتە سەرکوتگەرەکان.

 

ئەم ڕێکخراوانە لە ڕاگەیەندراوێکی هاوبەشدا کە ٩ی کانوونی دووەم بڵاویان کردەوە، تیشکیان خستە سەر ڕۆڵی سەرەکی ژنانی کورد لە خەبات بۆ دادپەروەری کۆمەڵایەتی و دژ بە هەڵاواردن و مانگرتن بە پەیامێکی ڕوونی بەرخۆدانی مەدەنی لە دژی پێکهاتە ناڕەواکانی دەسەڵاتدار.