ناوەندی هەواڵ

 

ڕێکخراوی مافی مرۆڤی هانا ڕایگەیاند، ژنێکی زیندانیی کورد بەناوی سەحەر مەهدی تەمەن ٣٢ ساڵ و خەڵکی شاری سەقز، ماوەی ٤٥ ڕۆژە لە گرتووخانەی سەقز ڕاگیراوە و چارەنووسی نادیارە.

 

ئاماژە بەوەشکراوە، سەرەڕای بەڵێنی سەرەتایی دەزگا ئەمنییەکان بۆ ئازادکردنی ئەو ژنە بە کەفالەت، بەڵام دەسەڵاتی دادوەری و ئەمنی تا ئێستا ئامادە نین ئازادی بکەن.

 

پێشتر سەحەر مەهدی لە لایەن هێزەکانی ئیتڵاعاتی ئێرانەوە بەبێ بوونی فەرمانێکی دادوەری دەستبەسەرکرا و گوازرایەوە بۆ گرتووخانەی سەقز. لە کاتی دەستبەسەرکردنیدا ئەفسەرەکان دەستیان بەسەر مۆبایلەکەی خۆی و ئەندامانی دیکەی خێزانەکەیدا گرتووە و لەگەڵ خۆیان بردوویانە.

 

سەرەڕای بەدواداچوونی بەردەوامی بنەماڵەکەی، هیچ زانیارییەک سەبارەت بە هۆکاری دەستبەسەرکردنی سەحەر مەهدی و ئەو تۆمەتانەی ئاراستەی کراوە، لەبەردەستدا نییە.

 

ڕێکخراوەکانی مافی مرۆڤ نیگەرانی قووڵیان لە دۆخی سەحەر مەهدی دەربڕیوە و ڕایانگەیاندووە، کە دیاردەکانی "دەستبەسەرکردن بەبێ بوونی فەرمانی دادوەری" و "بێسەروشوێنکردنی زۆرەملێ" ڕێوشوێنێکە لەلایەن دەزگا ئەمنییەکانەوە بۆ ترساندنی هاووڵاتییان بەکاردەهێندرێت.