مەغریب

گەشتی هەڵبژاردەی تۆپی پێی ژنانی مەغریب لە قۆناغی پێش کۆتایی جامی نەتەوەکانی ئەفریقای ژنان وەستا، پاش ئەوەی هەڵبژاردەی كامیرۆن سەرکەوتنی خۆی بۆ یاریی کۆتایی بە لێدانی سزا یەکلا کردەوە، ئەمەش دوای ئەوەی یارییەکە لە کاتی سەرەتایی و زیادکراودا بە بێ گۆڵ کۆتایی هات، لەو ڕووبەڕووبوونەوەیەی کە ١٢ی ئاب لە یاریگای "شانشینی مولای حەسەن" لە ڕاتی مەغریب ئەنجامدرا.

 

”لبؤات الأطلس” ”شێرەکانی ئەتڵەس” لە بەردەم دەرفەتێکی نوێدا بوون بۆ گەیشتن بە یاریی کۆتایی پاڵەوانێتییە کیشوەرییەکە بۆ سێیەم جار لەسەریەک، دوای ئەوەی پێشتر لە خولی ٢٠٢٢ و ٢٠٢٤ گەیشتبوونە یاریی کۆتایی، بەڵام لێدانی سزا لە بەرژەوەندی هەڵبژاردەی كامیرۆن شکانەوە کە توانی یارییەکە بە ئەنجامی ٣-١ یەکلا بکاتەوە.

 

لە ماوەی ٩٠ خولەکدا، هیچ یەک لە هەوڵەکانی هەردوو هەڵبژاردە نەیانتوانی ئەنجامەکە بگۆڕن، بۆیە یارییەکە درێژبووەوە بۆ کاتی زیادکراو، تەنانەت لە ماوەی ئەو ٣٠ خولەکە زیادکراوەشدا یەکسانبوونی بێ گۆڵ بەردەوام بوو، تاوەکو یارییەکە گواستراوەیە سەر لێدانی سزا کە بووە تاکە بڕیاردەری نێوان هەردوو هەڵبژاردە.

 

لە لێدانی سزادا، هەڵبژاردەی مەغریب سەرکەوتوو بوو لە تۆمارکردنی تەنها یەک لێدان، لە بەرامبەر سێ لێدانی سەرکەوتوو بۆ هەڵبژاردەی كامیرۆن کە سوودی لە درەوشانەوەی گۆڵپارێزەکەی وەرگرت بۆ بەدەستهێنانی بلیتی سەرکەوتن.

 

جێی باسە هەڵبژاردەی مەغریب لە قۆناغی چارەکی کۆتاییدا پاش بردنەوەی لە باشووری ئەفریقا بە ئەنجامی ٢-١ سەركەوتبوو بۆ قۆناغی پێش کۆتایی، ئەو ئەنجامەی کە مسۆگەری ئەوەشی کرد کە بگەنە جامی جیهانی ژنانی ٢٠٢٧ لە بەڕازیل.

 

بەڵام ئەم جارە ئامانجەکە تەنها گەیشتن نەبوو بە چوار گۆشەی زێڕین، چونکە هەڵبژاردەی مەغریب هەوڵی دەدا دەرفەتی بەدەستهێنانی ناونیشانی کیشوەری لەسەر خاکی خۆی بەدەست بهێنێت، دوای ئەوەی لە دوو خولی پێشوودا گەیشتبووە یاریی کۆتایی بەبێ ئەوەی بتوانێت جامەکە بەرز بکاتەوە.

 

بە شکستەکەی بەرامبەر كامیرۆن، بەشداری هەڵبژاردەی مەغریب لە پاڵەوانێتییەکەدا بە تەواوی کۆتایی نایەت، چونکە یاریی دیاریکردنی پلەی سێیەم چاوەڕێی دەکات، کە تێیدا ڕووبەڕووی هەڵبژاردەی جەزائیر دەبێتەوە، لە ڕووبەڕووبوونەوەیەکی مەغریبییدا کە دەبێتە دوایین دەرفەت بۆ کۆتاییهێنانی بەشدارییە کیشوەرییەکە لەسەر سەکۆی خەڵاتکردن.