لە تل تەمر ڕێز لە قوربانیانی کیمیابارانی هەڵەبجە گیرا
خەڵکی تل تەمر بۆ یادی کۆمەڵکوژی هەڵەبجە، بۆ ماوەی ٥ خولەک بێدەنگییان ڕاگەیاند، ئەو ژنانەی بەشداربوون لەو بێدەنگیەدا وتیان: ڕاپەڕین و شۆڕشەکانمان لەدژی دیکتاتۆرەکانی کوردستان و بکوژانی گەلەکەمان بەردەوام دەبێت تا دەگەینە پێگەی خۆمان.
تل تەمر
لە ١٦ی ئاداری ساڵی ١٩٨٨ ڕژێمی سەدام حوسێن کیمیابارانی گەلی کوردی لە هەڵەبجە دەستپێکرد، لەم کیمیابارانەدا ٥ هەزار کەس کوژران و زیاتر لە ١٠ هەزار کەسیش بریندار بوون، ئەمڕۆ ٣٨ ساڵ بەسەر کۆمەڵکوژیی هەڵەبجەدا تێدەپەڕێت، خەڵکی تل تەمر لە کانتۆنی جزیرە بە یادی هەڵمەتی ئەنفالکردنی هەڵەبجە بۆ ماوەی ٥ خولەک بێدەنگی و وەستانیان ئەنجامدا.
”کورد بکوژ زۆرن، بۆیە هەمیشە لە تێکۆشانداین”
خەدیجە ئاسیم، کە بەشداریی ئەو بۆنەیە کرد، شەرمەزارکردنی هێرشەکانی حکومەتی عێراقی دژی گەلی کورد لە هەڵەبجە کرد و وتی: هێرش و کۆمەڵکوژییەکانی دژی گەلی کوردستان نەوەستاون، تا ئەمڕۆش بەردەوامن، لە هەڵەبجە کیمیاباران کرا، بەڵام لە سووریا کورد مافەکانی لێ داگیر کرا و کۆمەڵکوژی دژی گەل بەردەوام بوو، بکوژانی گەلی کورد لە عێراق بریتین لە سەدام حسێن و لە تورکیا ئەردۆغان و لە سووریا بەشار ئەسەد، کوژەکانمان زۆرن، بەڵام گەلی کورد دەستبەرداری دۆزی خۆی نابێت، لە کۆمەڵکوژی و جینۆساید ناترسین، چونکە ئێمەی کورد مافێکمان هەیە و بەدەستی دەهێنین.
”ئەمڕۆ ڕۆژی بوون و کەرامەتە”
خەدیجە ئاسم ڕایگەیاند، سەرەڕای هێرشە جینۆسایدییەکان، ئاوارەیی، کۆمەڵکوژی و هەڵمەتەکانی ئەنفال، گەلی کورد جارێکی دیکە لە هەر چوار پارچەی کوردستان هەڵدەستێت و درێژە بە خەباتی خۆی دەدات، خەدیجە ئاسیم داوای لە گەلی کورد کرد لە یادی ٣٨ ساڵەی کیمیابارانی هەڵەبجە بەهێزتر شۆڕشبکەن، هەروەها ئەمڕۆ ڕۆژی بوونی و کەرامەتە، پێویستە کورد شۆڕشەکانی سەرکەوتوو بکات و ئاڵای نیوە مەستی شەهیدبوون و سەرکەوتن بەدەستبهێنێت.
”برینی هەڵەبجە هەموو ڕۆژێک لە دڵماندا نوێ دەبێتەوە”
گوڵیخان سۆفی، هاوسەرۆکی ئەنجومەنی شارۆچکەی تل تەمر ڕایگەیاند، برینەکەی هەڵەبجە برینێکی ئاسایی نییە و ژیانی پێنج هەزار کورد هەرزان نییە، دەبوو ئەمڕۆ هەموو جیهان بوەستێت کە کیمیاباران کرا و کورد کۆمەڵکوژ کرا، دەبوو لێپرسینەوەی لەگەڵدا بکرایە و دادپەروەری بکرایە، چونکە بکوژەکانمان لەبیر نەکردووە، برینی هەڵەبجە هەموو ڕۆژێک لە دڵماندایە.
گوڵیخان سۆفی لە کۆتایی قسەکانیدا بە ڕاکێشانی سەرنج بۆ هێرشەکانی ئەم دواییەی دژی گەلی کورد ڕایگەیاند کە ئەم هێرشە درێژەپێدەری کۆمەڵکوژیی هەڵەبجەیە.