ناوەندی هەواڵ

 

کوشتنی منداڵان لەو ناوچانەی کە لەلایەن جیهادییەکانی هەتەشەوە کۆنترۆڵکراون، بووەتە بەشێک لە دیمەنێکی کارەساتبار کە ژیانی گەنجانی خستووەتە مەترسییەوە، لە نەبوونی میکانیزمی پاراستنی کارادا.

 

ڕوانگەی سوری بۆ مافەکانی مرۆڤ، ٢٦ی کانونی یەکەم بڵاویکردەوە، کە منداڵێکی تازە لەدایکبووی کچ لە نزیک زبڵدانێک لە گەڕەکی مەزیرەیب لە گوندەکانی ڕۆژئاوای دەرعا دۆزرایەوە.

 

بەگوێرەی ئەو ڕوانگەیە، منداڵەکە بە ئامێرێکی تیژ لە سەری دراوە، کە بووەتە هۆی گیانلەدەستدانی، لە هەلومەرجێکدا کە تا ئێستا ڕوون نییە.

 

لەگەڵ دۆزینەوەی تەرمەکە، هێزی پۆلیس لە مەزیرەیب و بەشی لێکۆڵینەوەی تاوانەکان چوونە شوێنی ڕووداوەکە، دواتر گواسترایەوە بۆ لایەنە پەیوەندیدارەکان بۆ دەستپێکردنی لێکۆڵینەوەکان و ئاشکراکردنی بارودۆخی تاوانەکە.

 

چالاکوانانی ڕوانگەی سوری تۆماریان کردووە، لە سەرەتای ساڵی ٢٠٢٥ەوە، نزیکەی ٣٣ حاڵەتی جێهێشتنی منداڵی تازە لەدایکبوو لە ناوچە جیاجیاکانی سووریا، کە لەناو دەفر و جانتا و شوێنە گشتییەکاندا دۆزراونەتەوە، ئەمەش بۆتە دیاردەیەک کە نیگەرانییەکانی لای ڕێکخراوەکانی مافی مرۆڤ و مرۆیی دروستکردووە.