ناوەندی هەواڵ

 

لە ١٥ی حوزەیرانی ئەمساڵ، دەوڵەتی داگیرکەری تورک، بە نزیکەی هەزار سەرباز و ٣٠٠ تانک و زرێپۆشی سەربازییەوە لەشکرکێشییەکی نوێی بۆ سەر باشووری کوردستان دەستپێکرد و ٩ بارەگای نوێی کردەوە، بەو هۆیەوە ١٨٤ خێزانی ناچار بە جێهێشتنی زێدی خۆیان کردووە و بە بەردەوامیش بۆردوومانی سنووری پارێزگای دهۆک دەکات.

 

بەپێى زانیارییەکان، ئەمڕۆ ٩ی ئاب فڕۆکە جەنگییەکانی دەوڵەتی داگیرکەری تورک بە چڕى بۆردوومانی هەریەکە لە گوندەکانى گوهەرزی و کانی بەلاڤێ و چیاى مەتینایان لە سنووری شارۆچکەی ئامێدی سەر بە پارێزگای دهۆک کرد.

 

هەروەها، هێرشەکەى دەوڵەتى تورک بۆسەر سنوورى ئەو گوندانەى سنوورى ئامێدى بۆ ماوەى چەند کاتژمێرێک بەردەوام بووە و بەهۆیەوە زیانێکى زۆر بەر ژینگەى ناوچەکە گەشتووە.

 

ئەوە لەکاتێکدایە شەوی ڕابردوو فڕۆکەکانی تورکیا بۆردومانی گوندەکانی سەفرەو گەڵاڵەو شاخەڕەشی لە شارباژێری سلێمانی کردو بەهۆی ئاگرێکی فراوان کەوتەوە.