ناوەندی هەواڵ

 

هەفتەی ڕابردوو تەرمی پارێزەر خەسرەو عەلی کوردی تەمەن ٤٦ ساڵ لە نوسینگەکەی دۆزرایەوە و بنەماڵەکەی وتیان، هێزەکانی ئاسایش دەستیان بەسەر گرتە ڤیدیۆییەکانی کامێرای چاودێری لە شوێنەکەدا گرتووە، بەو هۆیەوە چالاکوانان لە مەراسیمەکەیدا بەشداریان کرد و ناڕەزایەتییان دەربڕی و بەوهۆیەوە ژمارەیەک لە چالاکوانان و هاوڵاتییان دەستگیر کران.

 

کۆمەڵگەی ژنانی ئازادی ڕۆژهەڵاتی کوردستان "کژار" سەبارەت بە دەستگیرکردنی چالاکوانانی ئێران لە لایەن هێزەکانی وەزارەتی ئیتلاعاتی ئێرانەوە ڕاگەیەندراوێکی بڵاوکردەوەو تێیدا هاتووە: بەدرێژایی پەرەسەندنە کۆمەڵایەتی و سیاسییەکانی ئێران ژنان هەمیشە ڕۆڵێکی چالاکیان هەبووە و هەر بەو هۆیەشەوە لە کاتی جیاجیادا ڕووبەڕووی کۆتوبەند و فشاری ئەمنی بوونەتەوە، هەروەها ئەم ڕێوشوێنانە بەتایبەتی دژی ژنانی چالاک لە بوارە کۆمەڵایەتی و مەدەنییەکاندا جێبەجێ دەکرێن.

 

ئاماژە بەوەشکراوە، لە مەراسیمی خەسرەو عەلی کوردی بەشێک لە بەشداربووان و چالاکوانانی ژن لەگەڵ هێزە ئەمنییەکاندا ڕووبەڕووی پێکدادان بوونەوە و دەستگیر کراون، ئەو کارانە لە چوارچێوەی سیاسەتی گشتیی حکومەت بۆ مامەڵەکردن لەگەڵ خۆپیشاندان و چالاکییە ڕەخنەگرەکان هەڵسەنگێنراون.

 

لە ڕاگەیەندراوەکەیدا ئاماژەی بە نێرگس محەمەدی، هەستی ئەمیری و سپیدە قولیان کردووە کە وەک چالاکوانان ڕووبەڕووی توندوتیژیی جەستەیی بوونەتەوە.

 

لە کۆتایی ڕاگەیاندراوەکەدا کژار جەختی لە پێویستی هاوخەباتی و هاوکاری نێوان ژنان لە سەرانسەری ڕۆژهەڵاتی کوردستان و ئێران کردەوە، بە مەبەستی بەدواداچوونی مافە کۆمەڵایەتی و یاسایی و مەدەنییەکان و داوای بەردەوامی چالاکییە هاوبەشەکانی کرد لەم بوارەدا.