قامیشلۆ

 

کۆردیناسیۆنی ژنانی ئەنجومەنی جێبەجێکردن، ئەنجومەنی داد و ئەنجومەنی گەل  لە شاری قامیشلۆ ناڕەزایەتیەکیان ڕێکخست و ڕاگەیاندراوێکی خوێندەوە، ئەم ناڕەزایەتییە لە وەڵامی پەرەسەندنی بەردەوامی تاوان و پێشێلکارییە سیستماتیکییەکان کە ژنان و هاوڵاتیانی مەدەنی بێچەک دەکەنە ئامانج، بەتایبەتی لە گەڕەکەکانی شێخ مەقسود و ئەشرەفیە لە حەلەب.

 

ئەم ناڕەزایەتییە وەک دەربڕینێکی سیاسی و کۆمەڵایەتی ڕوونی ڕەتکردنەوەی سیاسەتەکانی کوشتن و گەمارۆدان و برسێتی و پێشێلکردنی سەختی مافی مرۆڤ هاتە ئاراوە، هاوارێکی ناڕەزایەتی بوو بەرامبەر بە بێدەنگی و هاوبەشی بێدەنگی نێودەوڵەتی سەبارەت بە هێرشە سیستماتیکییەکان بۆ سەر هاوڵاتیانی مەدەنی، جەختکردنەوە لەسەر ئەوەی کە بەئامانجگرتنی ژنان هێرشێکی ڕاستەوخۆیە بۆ سەر کۆمەڵگە بە گشتی و دەستکەوتەکانی شۆڕشی ڕۆژئاوا، داواکردن لە دەزگا نێودەوڵەتی و مافەکانی مرۆڤ بەرپرسیارێتی ڕەوشتی و یاسایی خۆیان لە ئەستۆ بگرن، هەروەها پێویستی گرتنەبەری ڕێوشوێنی بەپەلە بۆ دەستەبەرکردنی وەستانی پێشێلکارییەکان، پاراستنی هاوڵاتیانی مەدەنی، لێپرسینەوە لە ئەنجامدەرانی تاوانەکان، پاراستنی شکۆمەندی مرۆڤ و مافەکانی ژنان لە باکوور و ڕۆژهەڵاتی سووریا و هەموو خاکەکانی سووریا.

 

لە ڕاگەیاندراوەکەدا کە ڤیڤیان باهۆ، لە لیژنەی کۆردیناسیۆنی ژنان لە جزیرە خوێندوویەتییەوە، هاتووە، بە شانازییەوە یادی شەهیدان دەنیز ژیا، زیاد حەلەب، ڕۆژین حەسەکە، فراشین عەفرین، شەهید ئامارا، و شەهید لەیلا قاسم، لەگەڵ هەموو ئەو شەهیدانە دەکەین کە بەشدارییان لە بەرخۆدانی گەڕەکەکانی شێخ مەقسود و ئەشرەفیە کردووە.

 

"جیهادی و چەتەکانی داگیرکەری تورکیا کۆمەڵکوژییان لە دژی هاوڵاتیانی مەدەنی ئەنجامدا"

دووپاتی کردووەتەوە، کە گەڕەکەکانی شێخ مەقسود و ئەشرەفیە کەوتوونەتە بەر هێرشی سیستماتیک و دووبارە و بێ جیاوازی لەلایەن حکومەتی کاتییەوە، بە بەشداری دەوڵەتی تورکیا، بە سوود وەرگرتن لە چەکی قورس، ئەم هێرشانە هاوڵاتیانی مەدەنیان کردە ئامانج، لەوانە ژنان، منداڵان، بەتەمەنەکان، خاوەن پێداویستییە تایبەتەکان، بەبێ هیچ جیاکارییەک، بە پێشێلکردنی ئاشکرای هەموو یاسا و ڕێککەوتننامە نێودەوڵەتییەکان، ئەم هێرشانە بۆ ماوەی پێنج ڕۆژ لەسەریەک بەردەوام بوون و وێرانکارییەکی بەرفراوان و زیانلێکەوتووانی مەدەنی بێتاوانی بەجێهێشت.

 

پێی وایە بە ئامانجگرتنی هاوڵاتیانی مەدەنی و ماڵ و باڵەخانە دیاریکراوەکان بۆ مەبەستی مرۆیی و پەروەردەیی، وەک نەخۆشخانە و خوێندنگەکان، تاوانێکی جەنگی تەواو و پێشێلکردنی ئاشکرای یاسای مرۆیی نێودەوڵەتی پێکدەهێنێت، ڕاستەوخۆ پێچەوانەی بڕگەکانی ڕێککەوتننامەی چوارەمی جنێڤی ساڵی ١٩٤٩ و پەیڕەوی زیادەی ڕێککەوتننامەی لاهای ساڵی ١٩٠٧ و یاسای ڕۆمایە کە بەڕوونی قەدەغەکردنی بەئامانجگرتنی هاوڵاتیانی مەدەنی و قەدەغەکردنی هێرشی بێ جیاوازی و کوشتن و ئەشکەنجەدان و مامەڵەی خراپ بە تاوان دەزانێت و هێرشکردنە سەر کارمەندانی پزیشکی و بارمتەگرتن قەدەغە دەکات، هەروەها کوشتن و کۆچکردنی زۆرەملێ کە لەلایەن حکومەتی گوازراوە و دەوڵەتی تورکیاوە بەرامبەر کورد لە گەڕەکەکانی شێخ مەقسود و ئەشرەفیە ئەنجامدراوە، نیازێکی ڕوون بۆ ئەنجامدانی جینۆساید نیشان دەدات.

 

لە ڕاگەیەندراوەکەدا، ئەو تاوان و پێشێلکارییانە شەرمەزار کراوە، جەختیش لەوە کراوەتەوە، کە ئەنجامدانیان تاوانی دژ بە مرۆڤایەتی پێکدەهێنێت و عەقڵیەتێکی تاوانکاری ئاشکرا دەکات کە ژنان و کۆمەڵگە دەکاتە ئامانج بۆ شکاندنی ئیرادەیان و تێکدانی سەقامگیرییان، داوای لە کۆمەڵگەی نێودەوڵەتی و سکرتێری گشتی نەتەوە یەکگرتووەکان و دەوڵەتانی گەرەنتیکار کرد کە بەرپرسیارێتی یاسایی و ڕەوشتی خۆیان لە ئەستۆ بگرن و کار بۆ لێپرسینەوە لە ئەنجامدەرانی ئەو تاوانانە بکەن، پێویستە دوای لێکۆڵینەوەیەکی ڕوون و سەربەخۆی نێودەوڵەتی، ڕەوانەی دادگای تاوانە نێودەوڵەتییە کارامەکان بکرێت، بۆ ئەوەی دادپەروەری بۆ زیانلێکەوتووان مسۆگەر بکرێت و تاوانباران لە سزا ڕزگاریان نەبێت.

 

”داوای دوو هێندەکردنی هەوڵەکان دەکەین بۆ ئاشکراکردنی ڕاستییەکان”

لیژنەی کۆردیناسیۆنی ژنان، داوای لە ئەنجومەنی ئاسایشی نەتەوە یەکگرتووەکان کردووە، بەپەلە هەنگاو بنێت بۆ پاراستنی دانیشتووانی گەڕەکی شێخ مەقسولود و ئەشرەفیە، دامەزراوە مەدەنی و ئاسایشییەکان بەتایبەتی هێزەکانی ئاسایشی ناوخۆ، هەروەها پاراستنی موڵک و ماڵی گشتی و تایبەت، هەروەها داوای لێپرسینەوە لە ئەنجامدەرانی تاوانە قێزەونەکەی دژی شەهید دەنیز ژیا کرد کە جەستەی بڕیە و فڕێی دا، ئەمەش کردەوەیەکە کە پشتڕاستی دەکاتەوە ئەم پێشێلکاریانە لە عەقڵیەتێکی داعشەوە سەرچاوەی گرتووە کە ڕەگداکوتاوی قووڵە و بەردەوامە لە هەڕەشەکردن لەسەر هەموو مرۆڤایەتی.

 

لە ڕاگەیاندراوەکەدا داوا لە سەرجەم ڕێکخراوەکانی ژنان و مافی مرۆڤ و مرۆیی کراوە هەوڵەکانیان دوو هێندە بکەن بۆ ئاشکراکردنی ڕاستیەکان و گەورەکردنی دەنگی زیانلێکەوتووان و پاڵپشتی پێویست پێشکەش بە دانیشتووانی گەڕەکی شێخ مەقسود و ئەشرەفیە کە ڕووبەڕووی گەمارۆ و هێرشی بەردەوام بوونەتەوە.

 

لە کۆتاییدا لیژنەی کۆردیناسیۆنی ژنان پابەندبوونی خۆی بە تێکۆشەرانی بەرخۆدان، چ ژن و پیاو و بە شەهیدان دووپات کردەوە، بەڵێنیدا کە شوێنپێی ئەوان بکەون و بەردەوام بن لە تێکۆشان تا گەیشتن بە ئامانجە ڕەوایەکانی گەلەکەمان بۆ ئازادی و شکۆمەندی، لیژنەکە هیوای چاکبوونەوەی خێرای بۆ بریندارەکان خواست، هەروەها خوێنیان وەک چرایەک دەمێنێتەوە کە ڕێنمایی ڕێگای سەرکەوتن دەکات.