ناوەندی هەواڵ

 

کۆمەڵەی ژنانی عێراق سەبارەت بە هێرش و داگیرکارییەکانى دەوڵەتى تورک و چەتەکانى جۆلانى دژ بە ڕۆژئاواى کوردستان بە تایبەتى دژى ژنان، ڕاگەیاندراوێکی بڵاوکردەوە.

 

دەقی ڕاگەیاندراوەکە بەم شێوەیەیە:

ناوچەکانى ڕۆژئاواى کوردستان بە قۆناغێکی سەختدا تێدەپەڕێت، بەهۆی دەستێوەردانەدەرەکی و کاردانەوەی ناوچەیی و نێودەوڵەتیییەکان دۆخەکە ئاڵۆزتر بووە، ئەم کاردانەوەیە کاریگەرییەکی ڕوونی لەسەر بارودۆخی کۆمەڵایەتی، مرۆیی و ئابووری هەبووە، خزمەتگوزارییە سەرەتاییەکان تێکچوون و بارودۆخی ژیان تادێت قورستر دەبێـت، جگە لەوەش ژنانی ڕۆژئاوا لە ناوچەکانی ململانێ و ئاوارەبووندا ڕووبەڕووی سەختییەکی ئاڵۆزتر دەبنەوە.

 

شەڕە بەردەوامەکان و هێرشە سەربازییەکانى سووریا کاردانەوەى قورسی لێکەوتەوە، دەرئەنجامەکەى لەڕادەبەدەر مەترسیدارە و هەڕەشە لە ئاسایش و سەقامگیری ژنانی ئەو ناوچەی دەکات، کە بوونەتە دیارترین قوربانیانی ئەو ململانێیانە.

 

 ئەو پێشێلکارییە قورسانەی لە پارێزگاکانی حەسەکە و دێرەزۆر و ڕەققە ڕوویاندا، لەوانەش بێڕێزیکردن بە جەستەی ژنە شەڕڤانان و ژن و کچانی کورد، پێشێلکارییەکی ئاشکرا و قبوڵنەکراوی هەموو ڕێککەوتننامە نێودەوڵەتی و مرۆییەکان و پێشێلکردنی ئاشکرای بنەماکانی یاسای مرۆیی نێودەوڵەتی و کەرامەتی مرۆڤایەتییە.

 

کەمینە ئایینی و نەتەوەییەکان بە شێوەیەکی سیستماتیک دەکرێنە ئامانج، ئەمەش دەبێتە هۆی ئەوەی هەستی پاراستن و ئاسایش و سەقامگیرییان لەدەست بدەن، بە تایبەتی منداڵان کاریگەری توندوتیژی و تاوانە دڕندەکانیان لەسەرە، کە زەبرێکی دەروونی و کۆمەڵایەتی بەردەوامیان بۆ درووست دەکات، ئەمەش پێویستی بە دەستێوەردانی خێرا هەیە بۆ وەستاندنی ئەم تاوانانە و لێپرسینەوە لە تاوانباران و دادگاییکردنیان.

 

هاوڵاتیانى ئەو ناوچانە پێویستیان بە هاوکاری هەیە بۆ دابینکردنی ژینگەیەکی سەلامەت، هەروەها پێویستیان بە هەوڵی هاوبەش هەیە، بۆ دامەزراندنی بنەماکانی هاوڵاتیبوونی یەکسان و ڕێزگرتن لە فرەچەشنی و پێشخستنی کولتووری پێکەوەژیان وەک سەرچاوەی هێز بۆ کۆمەڵگا سەقامگیر و پێشکەوتووەکان.

 

کۆمەڵەی ژنانی عێراق ئیدانەی ئەو ڕووداوانە دەکات، کە لە هەندێک ناوچە و شارەکانی ڕۆژئاواى کوردستان و سووریا ڕوودەدەن و هاوسۆزی خۆیان لەگەڵ ژنانی ڕۆژئاوا دەردەبڕن، داوا دەکەن هەنگاوی بەپەلە بۆ بەرەنگاربوونەوەی ئەم ئاڵنگارییانە بنرێت، بە بەهێزکردنی مافەکانی مرۆڤ و سەروەری یاسا و پشتیوانیکردن لە چارەسەری ئاشتیانە و پەرەپێدانی هاوکاری بنیاتنەر لە نێوان کەسایەتى نیشتمانی و ناوچەیی و نێودەوڵەتییەکان بۆ پاراستنی مافەکانی مرۆڤ، بەتایبەتی مافی ژنان.