کەمپەینی یەکڕیزی ژنان بەردەوامن لە پێشکەشکردنی سیمینار لە خوێندنگەکاندا
لە درێژەی کاروچالاکییەکانی ٢٥ی تشرینی دووەمدا، کەمپەینی یەکڕیزی ژنان دژی توندوتیژی و داگیرکاری سیمینارێکیان پێشکەش بە خوێندکارانی خوێندنگەی بەهاری کچان کرد.
سلێمانی
سەرلەبەیانی ئەمڕۆ کەمپەینی یەکڕیزی ژنان دژی توندوتیژی و داگیرکاری لە درێژەی کار و چالاکییەکانی ٢٥ی تشرینی دووەم، ڕۆژی جیهانی بەرەنگاربوونەوەی توندوتیژی دژی ژنان، سیمینارێکیان لە ئامادەیی بەهاری کچان لە شاری سلێمانی پێشکەشکرد.
سیمینارەکە لەلایەن ژینۆ ڕەشید و ئاوارە کەرکووک، ئەندامی کەمپەینەکەوە پێشکەشکرا، تێیدا کورتەباسێکی مێژووی ٢٥ی تشرینی دووەم و هۆکاری دەستنیشانکردنی ئەو ڕۆژە وەک ڕۆژێکی مێژووی بۆ بەرەنگاربوونەوەی توندوتیژی دژ بە ژنان دەستیپێکرد.
پاشان لەلایەن ژینۆ ڕەشیدەوە هۆشیاری دەربارەی جۆرەکانی توندوتیژی و خۆپاراستن لێیان باسکرا "پێویستە ژنانی گەنج هۆشیاربن لە بەرامبەر هەر جۆرە توندوتیژییەک کە بەرامبەریان ئەنجام دەدرێت".
ئاماژەی بەوەشدا، لە هەرکات و شوێنێکدا ژنان لەلایەن پیاوانەوە دەستدرێژیان بکرێتە سەر پێویستە هۆشیارانە بە ڕووی توندوتیژییەکاندا بوەستنەوە و بەرەنگاری بکەن.
ت.پ