ناوەندی هەواڵ

 

پێنج ڕێکخراوی ژنانی ڕۆژهەڵاتی کوردستان کە پێکهاتوون لە؛ ڕێکخراوی ئازادیی ژنانی کوردستان "نینا"، ڕێکخراوی ئاسۆی ژنی کورد-ژنانی کۆمەڵە، ڕێکخراوی ئافرەتانی خەباتی کوردستانی ئێران، کۆمەڵگای ژنانی ئازادیی ڕۆژهەڵاتی کوردستان "کژار" و یەکێتی ژنانی دیموکراتی کوردستانی ئێران، بە پەیامێک سوپاس و پێزانینی خۆیان بۆ بەڕێوەچوونی مانگرتنی گشتیی دەربڕی کە لە شارەکانی ڕۆژهەڵاتی کوردستان، لە چوارچیوەی ناڕەزایتییەکانی ئێران و ڕۆژهەڵاتی کوردستان، وەک کاردانەوەیەک دژی ستەمی دەوڵەتی ئێران بەڕێوەچوو.

 

لە پەیامەکەدا ڕێکخراوی ژنانی ڕۆژهەڵاتی کوردستان، کە هەمووکات خەبات دژ بە زوڵم و زۆری پێکهاتەیی بەرامبەر بە ژنانیان بە داواکاری نەتەوەیی و کۆمەڵایەتی گەلەکەیانەوە گرێداوە، جەختیان کردووەتەوە، وەک ڕێکخراوەکانی ژنان باوەڕیان بەوە هەیە کە ژنان، رۆڵی سەرەکییان بۆ گەیشتن بە دادپەروەریی کۆمەڵایەتی، نەهێشتنی جیاکاری رەگەزی و بەرەنگاربوونەوەی هەموو جۆرەکانی ستەمێک هەبووە. هەر لەو چوارچێوەیەدا، ژنانی تێکۆشەری کۆمەڵگەی ئێران، بە تایبەتی ژنانی کورد، هەمووکات وەک پێشەنگی ئەم تێکۆشانانە ناسراون و بەشداریی چالاکانەیان، یەکێک لە بنەما سەرەکییەکانی خۆڕاگری کۆمەڵایەتی بووە.

 

ئەم ڕێکخراوانە خۆیان بە هاوبەش و هاوڕێی خەبات و تێکۆشانی گەلەکەیان دەزانن و بە ڕێز و پێزانینەوە، سوپاسی هاونیشتمانییانی هۆشیار بە تایبەت، دوکانداران و کاسبکارانی بەڕێزدەکەن کە بە هۆشیاری و ئاگاییەوە هەنگاوێکی کۆمەڵایەتی و بەرپرسیارانەیان بە داخستنی دوکان و بازاڕ، هاوخەباتی و هاوبەشیی خۆیان لەگەڵ هاونیشتمانییانی ئیلام و کرماشان و لۆڕستان و بەختیاری ڕاگەیاند، لە پەیامەکەیاندا هاتووە: “ئەم کردەوە ناڕەزایەتییە، وەڵامێک بوو بە داواکاری حەوت حزبی ڕۆژهەڵاتی کوردستان و دەرخەری ئاستی بەرزی وشیاریی کۆمەڵایەتی، ویژدانی ئاگا و ئیرادەی گشتیی ئێوە بە ناڕەزایەتی بەرامبەر بە قەوارەی نادادپەروەرو چەوسێنەری دەسەڵات.

 

ڕێکخراوەکانی ژنان لە بارەی مانگرتنەوە دەڵێن: “ئەم مانگرتن و هاودەنگییە، هەڵگری پەیامێکی ڕوون لە خۆڕاگری مەدەنیی دژ بە سیاسەت و کردارەکانی رژیم و سیستەمی کۆماری ئیسلامی بوو، پەیامێک کە جەختی لەسەر داوای مافی رەوا، کەرامەتی مرۆڤایەتی و ئازادی بۆ هەموو نەتەوە بندەستەکانی ژێر دەسەڵاتی رژیمی ئێران، کرد. ئەم هاودڵی کۆمەڵایەتیی و بوێریی مەدەنییە، تەنها سیمایەک لە بەرگریی ڕێکخراوەیی خەڵک نەبوو، بەڵکو نیشاندەری لێهاتوویی زۆری کۆمەڵگەیە ،بۆ کرداری کۆمەڵایەتیی لە راستای بەدەستهێنانی دادپەروەری و یەکسانی.

 

لە کۆتایدا ڕێکخراوەکانی ژنان بەم شێوەیە سوپاس و پێزانینی خۆیان دەربڕیوە: “ئێمە رێکخراوەکانی ژنان لەگەڵ سوپاس و پێزانینێکی زۆر، جەخت لەسەر بەردەوامبوونی هاوبەش و هاودەنگ و ڕۆڵی چارەنوسسازی هۆشیارانەی رۆژهەڵاتی کوردستان دەکەین لە بەرەوپێشبردن و دەستەبەرکردنی خەباتێکی دیموکراتێک و ئازادیخواز