ڕێکخراوەکانی ژنان سەبارەت بە دیلان قارەمان کۆمیسیۆنی لێکۆڵینەوەیان پێکهێنا
پێنج ڕێکخراوی ژنان لەگەڵ تەژەئا ڕایانگەیاند کە بۆ لێکۆڵینەوە سەبارەت بە گیان لەدەسددانی گوماناوی دیلان قارەمان، کۆمیسیۆنێکی لێکۆڵینەوەیان پێکهێنا.
ناوەندی هەواڵ
گیان لەدەستدانی گوماناوی دیلان قارەمان کە لە ڕۆژی ١١ی تشرینی دووەم، لە بەشی فریاکەوتنی نەخۆشخانە گیانی لەدەستدا، هۆکاری گیان لەدەستدانەکەی بە 'جەڵتەی دڵ' ڕاگەیەندرا، بەڵام ڕێکخراوەکانی ژنان ڕایانگەیاندووە، ئەو گیان لەدەستدانە گوماناوییە.
تەڤگەری ژنانی ئازاد "تەژەئا"، ناوەندی مافی ژنانی نووسینگەی پارێزەرانی ئامەد، کۆمەڵەی ژنانی ڕۆسای، کۆمیسیۆنی ژنانی لقی کۆمەڵەی پارێزەرانی ئازادی "ئۆهەدە"ی ئامەد و کۆمەڵەی پشتیوانی لە دۆخی ژنان "داکا-دەر" ڕایانگەیاند کە سەبارەت بە گیان لەدەستدانی گوماناوی دیلان قارەمان، کۆمیسیۆنێکی لێکۆڵینەوەیان پێکهێناوە.
لە راگەیەندراوەکەدا کە بەناوی هەر پێنج دامەزراوەکەوە بڵاوکراوەتەوە، ئاماژە بەوەکراوە، بەمەبەستی ڕوونکردنەوەی هەموو هۆکارەکانی مردنی دیلان قارەمان و جێبەجێکردنی بەرپرسیارێتیەکان لەو بارەوە، لە ئەندامانی دامەزراوە و ڕێکخستنەکانی ژنان کۆمیسیۆنی لێکۆڵینەوەیان پێکهێناوە.
هەروەها لە ڕاگەیەندراوەکەدا جەخت لەوەکراوەتەوە کە دەبێت هەموو بانگەشەکانی گرێدراو بە مردنی دیلان قارەمان و هۆکارەکانی بە شێوەیەکی ورد بەدواداچوون بکرێت و هەر بەرپرسیاریەتێک پەردە پۆش نەکرێت.