ناوەندی هەواڵ

 

سێ ڕێکخراوی مەدەنی نێودەوڵەتی ڕاگەیەندراوێکی هاوبەشیان دەرکرد و تێیدا نیگەرانی قووڵی خۆیان دەربڕی سەبارەت بە تێکچوونی دۆخی مرۆیی لە گەڕەکەکانی شێخ مەقسود و ئەشرەفییە لە شاری حەلەب، لە ئەنجامی بۆردوومان و گەمارۆی سەپێنراو لەلایەن هێزەکانی حکومەتی کاتییەوە کە بووەتە هۆی زیادبوونی ئازار و مەینەتییەکانی دانیشتووان و هەڕەشە بۆ سەر ژیانی ڕۆژانەیان.

 

ئەو ڕێکخراوانە کە بریتین لە "ڕێکخراوی جیۆستراتیژیی کۆمەڵگەی مەدەنیی کوردی، کۆمەڵەی ژنانی کوردی-نەمساوی بۆ هونەر و ڕۆشنبیری، و ڕێکخراوی ئەڵمانی بۆ گەشەپێدان و ئاشتی" ئاماژەیان بەوە کرد کە هاوڵاتیانی مەدەنی لە گەڕەکەکانی شێخ مەقسود و ئەشرەفییە، بەتایبەتی منداڵان و ژنان و بەساڵاچووان، ڕووبەڕووی دۆخێکی کارەساتبار بوونەتەوە بەهۆی نەبوونی خۆراک و دەرمان و ئاو و کارەبا، و هۆشدارییان دا لە مەترسیی ڕوودانی کۆمەڵکوژیی نوێ دژی دانیشتووانی ئەو گەڕەکانە.

 

بانگەوازەکە ئەم داواکارییانەی خستۆتەڕوو:

“- پێویستیی ڕاگرتنی دەستبەجێی کردەوە سەربازییەکان لە گەڕەکەکانی شێخ مەقسود و ئەشرەفییە، و دوورخستنەوەی هاوڵاتیانی مەدەنی لە نەهامەتییەکانی جەنگ.

– دابینکردنی پاراستنێکی پێویست و بەپەلە بۆ هاوڵاتیانی مەدەنی لە ڕێگەی پابەندبوونی هەموو لایەنەکان بەوەی کە گەڕەکە نیشتەجێبووەکان نەکەنە ئامانجی بۆردوومان یان هەڕەشەی هێرشکردنە سەریان.

– کردنەوەی ڕێڕەوی مرۆیی ئارام لەژێر سەرپەرشتیی نێونەتەوەیی بۆ گەیاندنی خۆراک و پێداویستییە پزیشکییەکان، و دابینکردنی گواستنەوەی حاڵەتە مرۆییە مەترسیدارەکان.

– بانگهێشتکردنی لایەنە سوورییەکان، لە پێش هەموویانەوە ئیدارەی خۆبەڕێوەبەریی باکوور و ڕۆژهەڵاتی سووریا و حکومەتی سووریا، بۆ دیالۆگ و لێکتێگەیشتن لەپێناو چەسپاندنی ئاشتی و سەقامگیری لە شاری حەلەب و شارەکانی تری سووریا”

 

لە ڕاگەیەندراوەکەدا داوا لە کۆمەڵگەی نێودەوڵەتی، نەتەوە یەکگرتووەکان، ئەنجومەنی ئاسایش، کۆمیسیۆنی باڵای مافی مرۆڤ، و هەموو ڕێکخراوەکانی مافی مرۆڤ و ڕێکخراوە مرۆییەکان کرد کە دەستوەردانی بەپەلە بکەن بۆ ڕاگرتنی کردەوە سەربازییەکان و دابینکردنی پاراستنی دەستبەجێ بۆ هاوڵاتیانی مەدەنی، لەگەڵ کردنەوەی ڕێڕەوی مرۆیی ئارام بە سەرپەرشتی نێونەتەوەیی.