سەردەشت

هەرچەندە وەرزی هاوین بەرەو کۆتا دەچێت، بەڵام ئاگرکەوتنەوەیەکی زۆر لە دارستانەکانی زاگرۆس بە تایبەتی لە شاری سەردەشت بەردەوامە و لە ماوەی هەفتەی ڕابردوودا لانیکەم ٩ ئاگر لە شاری سەردەشت کەوتوونەتەوە.

 

بە وتەی چالاکوانانی ژینگەپارێز، ئەم ڕووداوانە بە هۆی وێرانکردنی بە ئەنقەست لەلایەن هێزە ئەمنیەتی و نیزامییەکانی ڕژێمی ئێرانەوە بووە و ئەم هێرشانە بۆ سەر دارستانەکان بە شێوەیەکی ڕێکوپێک و زیاتر لە ڕابردوو ڕوودەدەن.

 

سارارا "ناوی خوازراو" یەکێک لە چالاکوانانی ژینگەپارێزی ئەم بوارە دەڵێت: "ئەوان ڕێگەی جیاواز بەکاردەهێنن بۆ زیانگەیاندن بە دارستانەکان، هەندێک جار هێزەکانی حکومەت یان کەسانێک کە بۆ ئەو مەبەستە بەکرێگیراون، ئاگر لە شوێنە جیاوازەکانی دارستانەکە دروست دەکەن و دواتر دەستبەجێ ناوچەکە بەجێدەهێڵن، لە هەندێک حاڵەتدا ئەم کەسانە بە بیانووی کۆکردنەوەی میوەی کێوی دەچنە ناو دارستانەکەوە و ئاگر دەکەنەوە."

 

ئاماژەی بەوەشکرد: "بەداخەوە چالاکوانانی ژینگەپارێز لە بەرامبەر ئەم جۆرە ڕووداوانەدا دەستی بەتاڵن و تەنها گژوگیا و گەڵای دار بەکاردەهێنن بۆ بەرەنگاربوونەوەی ئاگرەکان، ئەو ئیمکاناتانەی کە هەیانە، ستاندارد نین و تەنانەت هەندێکجار مەترسیدارن، وەک ئەو بەنزینە هەڵکەرانەی کە بۆ کوژاندنەوەی ئاگرەکە بەکاریدەهێنن."