ناوەندی هەواڵ

 

ئەو خۆپیشاندانانەی کە لە ٢٨ی کانوونی یەکەمی ٢٠٢٥ لە بازاڕی تاران دژی قەیرانی ئابووری دەستیان پێکرد، لە  ڕۆژهەڵاتی کوردستان و ئێران بەردەوامن و بە سەرتاسەری وڵاتدا بڵاوبوونەتەوە. لە ئەنجامی دەستێوەردانی ڕژێمی ئێران بە فیشەکی ئاگرین بۆ سەر چالاکییە جەماوەرییەکان، ژمارەیەکی زۆر کەس گیانیان لەدەستداوە. بەهۆی ئاستەنگ کردنی ئینتەرنێت لە سەرتاسەری وڵات، پەیوەندی هاووڵاتییان لەگەڵ جیهانی دەرەوە تا ڕادەیەکی زۆر پچڕاوە.

 

دوای هێرشە قورسەکانی ڕژێم بە چەکی قورس لە ٧ و ٨ی کانوونی دووەمدا، لە ١٧ و ١٨ی شوبات مەراسیمی ٤٠ ڕۆژەی ئەو کەسانەی گیانیان لەدەستدابوو بەڕێوەچوو. لە چوار ڕۆژی ڕابردوودا، بەهۆی مانگرتنی خوێندکارانی زانکۆوە، خۆپیشاندانەکان جارێکی دیکە پەرەیان سەندەوە. خوێندکاران لە ٢١ی شوباتدا بانگەوازییان کرد و ڕایانگەیاند کە لە ٢٣ی شوبات مان دەگرن.

 

دوێنێ بەدرێژایی ڕۆژەکە، هەزاران خوێندکار گۆڕەپانی زانکۆکانیان پڕکردو بە دروشمەکانی "مەرگ بۆ دیکتاتۆر" و "ئازادی"، زانکۆکانیان گۆڕی بۆ گۆڕەپانی گردبوونەوە.

 

شەپۆلی خۆپیشاندان لە زانکۆکاندا

زانکۆی تەربیەت مودەریس لە تاران: خوێندکاران بە دروشمی دژ بە خامنەیی لەناو زانکۆ کۆبوونەوە. خوێندکاران پەیامی "هەتا مەلا نەکرێتە کفنەوە، ئەم نیشتمانە نابێتە نیشتمانی ڕاستەقینە" و "ئەمە کۆتا پەیامە - ئامانجی سەرەکی خودی ڕژێمە"یان بەرزکردەوە.

 

زانکۆی شەریف: لە پێشەنگی بانگەوازی مانگرتنی ٢٣ی شوبات بوو، باس لەوە دەکرێت کە هێزەکان بە جلوبەرگی مەدەنییەوە هەوڵیان داوە ڕێگری لەو خوێندکارانە بکەن کە دەیانویست بەشداری خۆپیشاندانەکان بکەن. خوێندکاران لە ڕاگەیەندراوێکدا ڕژێمیان بە "بەکرێگیراوی چەکدار و بکوژ" ناوبرد و داوایان لە گەل کرد لە بەردەم زانکۆکاندا هاوپشتییان بکەن.

 

زانکۆی تاران: خوێندکاران گردبوونەوەیەکی جەماوەرییان ئەنجامدا. دروشمەکانی "تاوانەکانی ئەم هەموو ساڵە - مەرگ بۆ ئەم سیستەمی ویلایەتە"، "مەرگ بۆ دیکتاتۆر"، و "تا مەلا نەکرێتە کفن، ئەم وڵاتە نابێتە وڵاتی ڕاستەقینە" وترانەوە.

 

زانکۆی زەهرا: خوێندکاران بە وێنەی هاوڕێ کوژراوەکانیانەوە بەشدارییان لە چالاکییەکاندا کرد، دروشمی "ژن، ژیان، ئازادی" و "مەرگ بۆ دیکتاتۆر"یان وتەوە و ئاڵای کۆماری ئێرانیان سووتاند.

 

زانکۆی زانست و کولتوور: سەدان خوێندکار خۆپیشاندانیان ئەنجامدا،  پەیامی "درێژە بە ڕێگای ئازیزانمان دەدەین"یان دا، هەروەها لە کاتی خۆپیشاندانەکاندا دروشمەکانی "یەکێک دەمرێت و هەزاران زیندوو دەبنەوە" و "بەسیجی، سپای، داعش - ئێوە هەمان شتن" وترانەوە.

 

زانکۆی ئەمیرکەبیر: خوێندکارانی کۆبووەوە پەیامی "نە شا و نە مەلا"یان دا.

 

زانکۆی تەکنەلۆژیای ئەسفەهان: خوێندکاران کۆبوونەوە و بە دروشمەکانی "ئەمساڵ ساڵی خوێنە - خامنەیی دەڕوخێت" و "دوای چەندین ساڵ لە تاوان - مەرگ بۆ ئەم حکومەتی ویلایەتە" چالاکیان دژی دەوڵەت ئەنجامدا.