ئەنقەرە

 

ماوەی ٥٢ ڕۆژە کوڕەکەی ئامینە شەنیاشار دەستبەسەرە، هەر بۆیە ئەمڕۆ ئامینە لە بەردەم وەزارەتی داد لە ئەنقەرەی پایتەختی تورکیا، درێژە بە ناڕەزایەتی خۆیدا و داوای دادپەروەری کرد.

 

ئامینە شەنیاشار لە پەرلەمان لەگەڵ فەرید شەنیاشاری کوڕی بە کورسییەکی گەڕۆکەوە هاتنە وەزارەتی داد و تابلۆیەکی هەڵگرتبوو کە لەسەری نووسرابوو 'دادپەروەری'، داوای ئازادکردنی فادل شەنیاشاری کوڕی کرد.

 

ئامینە شەنیاشار، لە ٩ی ئاداری ٢٠٢١ وە دەستی بە ناڕەزایەتی خۆی کردووە، دوای ئەوەی هاوسەرەکەی و دوو کوڕەکەی بە ناوەکانی عادل و جەلال شەنیاشار، لە ١٤ی  حوزەیرانی ٢٠١٨ لەلایەن پاسەوان و کەسوکاری پەرلەمانتاری پارتی داد و گەشەپێدان ئیبراهیم خەلیل یەڵدزەوە کوژران، لەکاتێکدا کوڕەکەی فەرید شەنیاشار ڕزگاری بوو لە کۆمەڵکوژییەکەو تەنها بریندار بوو بەڵام دواتر ئەویش دەستبەسەر کرا.

 

ڕۆژی ١ی ئابی ٢٠٢٣، ئامینە شەنیاشار و جێگری پارتی چەپی سەوز لە شاری ڕەحا، ناڕەزایەتی خۆیان بۆ داوای دادپەروەری بۆ ئەو بنەماڵەیە دەربڕی، لە شاری ڕەحا بەرەو ئەنقەرەی پایتەختی تورکیا و بۆ وەزارەتی داد بەڕێکەوتن، بەڵام ڕێگری لە بنەماڵەی شەنیاشار کرا، ڕێگەی پێنەدرا بچنە ناو بینای وەزارەتەکە.

 

ئامینە شەنیاشار پێشتر ڕایگەیاندبوو دادگاییکردنی کوڕەکەی لە ١٨ی تەمووز بەڕێوەدەچێت و جەختیشی لەوە کردەوە کە ئەگەر کوڕەکەی ئازاد نەکرێت، ناڕەزایەتییەکەی دەگوازێتەوە بۆ ئەنقەرە.