ناوەندی هەواڵ

 

بەرەبەیانی ئەمڕۆ، ٧ی تشرینی دووەم، بازرگانانی شاری مەریوان مانیانگرت و هاوڵاتییانیش ڕژانە سەر شەقامەکانی شارەکە و دەنگی تەقە دەبیسترێت و دوکەڵ لە چەندین ناوچەدا بڵاوبووەتەوە.

 

هاوڵاتییانی شاری مەریوان بۆ دووهەمین ڕۆژ لەسەر یەک دوای کوژرانی نەسرین قادری، خوێندکارانی شاری مەریوان ڕژانە سەر شەقامەکانی شار و دوکاندارانیش درێژەیان بە مانگرتنەکانیان دا و دوکانەکانیان نەکردەوە، بەپێی وێنەی گەڕەکەکانی شاری مەریوان کە لە نیوەڕۆوە بڵاوکراونەتەوە هاوڵاتیان دەستیان بە ناڕەزایەتی کردووە و دەنگی تەقەش لە شارەکەدا دەبیسرێت.

 

بەگوێرەی ڕاپۆرت و وێنە بڵاوکراوەکان، هێزە ئەمنییەکان بە جلوبەرگی نافەرمییەوە بە ئامانجی ڕفاندنی هاوڵاتیان هەڵیانکوتایە سەر ماڵەکان و بە شێوەیەکی بەرفراوان هاوڵاتیانی ناڕازییان لە شەقامەکاندا دەستگیرکرد.

 

هەروەها دوێنێ لە کاتی کۆبوونەوەکاندا لانیکەم ٣٥ هاوڵاتی شاری مەریوان بە تەقەی هێزەکانی ڕژێم بریندار بوون.