ناوەندی هەواڵ

 

ئەمڕۆ لە شاری هەولێر ڕێکخراوی ئێمە بۆ گەشەپێدانی مرۆیی بە هاوکاریی رێکخراوی NPA نەرویجی و ئەنجوومەنی باڵای خانمان، لە کۆبوونەوەیەکی بەرفراوانی ژنانی چالاکوانی سیاسی، مەدەنی، مرۆڤی و ژنانی پارێزگاکانی هەرێمی کوردستان هاوپەیمانێتی ژنانی هەرێمی کوردستان ڕاگەیەندرا.

 

هاوپەیمانێتییەکە پێکدێت لە ژنانی چالاکوان لە بوارەکانی سیاسی، مەدەنی، چالاکوانانی مافی مرۆڤ و ژنان و ڕێکخراوەکانی ژنان، ئامانجیشیان یەکخستنی توانا و یەکدەنگی ژنان و ڕێکخراوەکانی تایبەت بە کاری ژنانە.

 

ڕاگەیاندنی هاوپەیمانێتییەکە لە کاتێکدایە کە دۆخی ژنان تا دێت بەرەو خراپی دەچێت، ڕێژەی توندوتیژییەکان لە ئاستێکی بەرزدایە و کوشتنی ژنانیش لە هەڵکشاندایە بە جۆرێک لەماوەی هەفتەی ڕابردوودا دوو ژن خۆیان کوشت و ژنێکیش بریندار کرا.

 

بەهار عەلی، بەڕێوەبەری ڕێکخراوی ئێمە بۆ گەشەپێدانی مرۆیی، بە میدیاکانی ڕاگەیاند، دەبێت هەموومان پێکەوە ڕێکخراوەکانی ژنان، ئەنجوومەنی باڵای خانمان، لایەنەکانی ناو حکومەت، بەڕێوبەرایەتیی بەرەنگاربوونەوەی توندوتیژیی دژی ژنان و لایەنە پەیوەندیدارەکان پێکەوە بە هاوبەشیی دژی توندوتیژیی دژی ژنان کاربکەین و هەوڵ بدەین بە ئاڕاستەى کەمبوونەوەی توندوتیژیی یان نەهێشتنی.

 

ت.پ