ناوەندی هەواڵ

 

لە ١٢٣ـەمین هەفتەی خۆیدا هەڵمەتی”سێشەمەکانی نا بۆ لەسێدارەدان” دژ بە سزای لەسێدارەدان لە ڕۆژهەڵاتی کوردستان و ئێران ڕاگەیاندراوێکی بڵاوکردەوە.

 

لە ڕاگەیاندراوەکەدا هاتووە، مانگرتن لە خواردن لە ٥٦ زیندانی ڕۆژهەڵاتی کوردستان و ئێران دژی سزای لەسێدارەدان بەردەوامە، ڕژێمی ئێران بۆ ڕێگریکردن لە تەقینەوەی توڕەیی گشتی بەهۆی خراپیی دۆخی ئابوورییەوە پەنای بردووەتە بەر سەرکوت و لە سێدارەدانی هاووڵاتیان، هاوکات لەم هەفتەیەدا دوو زیندانیی سیاسیی خۆپیشاندانەکانی ئەم دوواییەیی گەلانی ئێران بە ناوەکانی ئەشکان مالیکی و مێهرداد محەمەدی‌نیا لە زیندانی قزلحەسار لە سێدارە دراون.

 

ئاماژە بەوەشکراوە، وەزارەتی ئیتلاعات لە ڕێگەی هەڕەشە و تووڕەیییەوە خێزانی زیندانییانی سیاسی ناچار بە بێدەنگی دەکات، ئەمەش لە کاتێکدایە کە سزای لەسێدارەدانی زارا تەبەری، ڕەئووف مەعرووفی، محەمەد فەرەجی، بنیامین نەقدی و دوو برا بە ناوەکانی حەسەن و حوسێن ئەمیری پەسەند کراوە و مەترسیی جێبەجێکردنیان لەسەرە.

 

باس لەوەشکراوە، لە ماوەی ڕابردوودا دوو هاووڵاتیی کورد لە کۆمەڵگەی یارسان بە ناوەکانی موجتەبا و مەیسم وەیسی لە کاتی هێرشی پاسداران بۆ سەر شوێنی مانەوەیان کوژران، ئەندامانی هەڵمەتەکە داوایان لە کۆمەڵگەی نێودەوڵەتی و ڕێکخراوەکانی مافی مرۆڤ کردووە کە بۆ ڕاگرتنی ئەم کوشتارە بەپەلە بێنە دەنگ.

 

زیندانەکانی ئێڤین، قەزلحەسار، کەرەج، شیراز، مەشهەد و زۆربەی زیندانەکانی ڕۆژهەڵاتی کوردستان وەک سنە و ورمێ بەشدارن لەم مانگرتنە گشتییەدا.

 

جێگای ئاماژەیە، هەڵمەتی“سێشەمەکانی نا بۆ لەسێدارەدان” لە ٩ی کانوونی دووەمی ٢٠٢٣ وەک ناڕەزایەتییەک دژی لەسێدارەدانی دەستبەسەرکراوانی ڕۆژهەڵاتی کوردستان و ئێران دامەزرا، کە هەموو ڕۆژانی سێشەمەیەك ئەندامانی هەڵمەتەکە دەست بە مانگرتن لە خواردن دەکەن.