ئامەد

 

زیندانیانی زیندانیی ژمارە ١ی ئاسایشی باڵای ئامەد لە دژی پێشێلکارییەکانی مافی مرۆڤ ٣ ڕۆژە مانیان لە خواردن گرتووە، ڕاشیانگەیاند هەمیشە لەناو زیندانەکاندا هێرش دەکرێت و داوایان لە بنەماڵەکانیان کردووە بێدەنگ نەبن لە پێشێلکاری و ئەشکەنجەکانی مافی مرۆڤ، ئایشە ئاکین، یەکێک لە کەسوکاری زیندانییەکان، کاردانەوەی خۆی بەرامبەر بەو دۆخە پیشاندا و وتی: ئەگەر ئێمە خاوەندارییان لێنەکەین هەموویان دەکوژرێن.

 

ئایشە ئاکین، دوێنێ ١٤ی نیسان چاوپێکەوتنێکی تەلەفونی لەگەڵ کوڕەکەیدا بە ناوی عەبدولمەریک ئاکین کە لە زیندانی ژمارە ١دا زیندانە، کردووە و کوڕەکەی ئاماژەی بەوەداوە کە زیندانییەکان بە شێوەیەکی سیستماتیک ئەشکەنجەدراون، وتیشی: بەپێی زانیارییەکانی کوڕەکەم، پاسەوانەکان هەموو ڕۆژێک هێرش دەکەنە سەر قاوشێک و زیندانییەکان ئەشکەنجە دەدەن و بە زەویدا ڕایاندەکێشن.

 

"ڕووتیان دەکەنەوە و ئەشکەنجەی زیندانییەکان دەدەن"

ئەو دایکە ئاماژەی بەوەشدا کوڕەکەی نەخۆشە و لەبەرئەوەی سەپاندنی گەڕانی ناو زیندانی پەسەند نەکردووە نەیانگواستووەتەوە بۆ نەخۆشخانە، وتیشی: هەموو ڕۆژێک لە زینداندا هێرش دەکەنە سەریان، ڕووتیان دەکەنەوە و لێیان دەدەن و جلەکانیشیان نادەنەوە، زیندانییەکان دەکەنە ژووری تاکەکەسی و ناهێڵن کەس قسە لەگەڵ کەسدا بکات، لە پەیوەندی تەلەفونیدا ناهێڵن سڵاو لەیەکتر بکەن، کوڕەکەم وتی ئێمە ئەو فشارانە قبوڵ ناکەین، هەموو ڕۆژێک کەسێکمان دەبەن و ئەوانیش دەست بە مانگرتن لە خواردن دەکەن، لەناو زینداندا فشار و ئەشکەنجە هەیە".